हंगकंगय् प्रदर्शनय् गोली प्रहार

हंगकंगय् सोमवाः सुथय् जूगु विरोध प्रदशैनय् प्रहरीं गोली कयेकूगु दु । फेसबुकय् जुयाच्वंगु प्रत्यक्ष प्रसारणय् छम्ह प्रहरी अधिकृतं सतक बन्द यानाच्वंम्ह छम्ह प्रदर्शनकारीयात ख्याये न्ह्यः बन्दूक लिकाःगु खनेदुगु खः । ख्वाः त्वपुयातःम्ह मेम्ह छम्ह प्रदर्शनकारीयात उम्ह अधिकृतं म्हय् गोलीं कयेकूगु खः ।

झडप जुयाच्वंगु इलय् प्रहरीं मेगु निगू राउण्ड नं गोली कयेकूगु भिडियोय् खनेदुगु खःसां उगु गोली सुयातं लाः कि मलाः धयागु धाःसा स्पष्ट खनेमदुगु खः । गोलीं लाःम्ह मनूया अपरेशन जुयाच्वंगु व वयागु अवस्था गम्भीर दुगु खँ वयात उपचार यानाच्वंगु अस्पतालं धाःगु दु ।
वंगु जून महिनाय् विरोध प्रदर्शन सुरु जुइधुंकाः हंगकंगय् थुकथं गोलीं कयेकूगु थ्व स्वक्वःखुसी खः ।

सोमवाः प्रदर्शनकारीतय्सं उत्तरपूर्वी क्षेत्रया साइ वान होया सतक बन्द यायेगु कुतः याःगु खः । प्रदर्शनया झ्वलय् हंगकंगया थीथी थासय् झडप जुयाच्वंगु समाचार नं पिहां वयाच्वंगु दु ।

अनलाइनय् तयातःगु छगू भिडियाय् छम्ह प्रहरीं सिइकचायेकं हे प्रदर्शनकारीत च्वनाच्वंथाय् मोटरसाइकल न्याकः यंकूगु नं खनेदुगु खः । मेखे चाइनिज विश्वविद्यालयय् प्रदर्शनकारीतय्सं अप्पां कयेकेवं प्रहरीं नं रबरया गोली कयेकूगु दु । गुलिखे थासय् प्रहरीं अश्रुग्यास नं कयेकूगु खः ।