ने. सं. ११४६ बछलागा तृतीया -

किपू नगर सुरक्षित दु – रमेश महर्जन, मेयर

कोरोना भाइरसया संक्रमण जुइके मबिइत सरकारं घोषणा यानातःगु लकडाउनया इलय् किपूया अवस्थायात कयाः किपू नगरपालिकाया मेयर रमेश महर्जन लिसे नेपालभाषा टाइम्सया निंतिं तेजनारायण महर्जनं यानादीगु चिहाकःगु खँल्हाबल्हा –

कोरोना भाइरस संक्रमणया सम्बन्धय् आः किपू नगर गज्याःगु अवस्थाय् दु ?
आःया इलय् धायेगु खःसा किपू नगरपालिका कोरोना भाइरसया सम्बन्धय् पूर्ण रुपं सुरक्षित दु धाःसां ज्यू । थन आःतक छम्ह नं कोरोना संक्रमितत लूगु मदुनि । अथेहे नगरवासीतय् जनचेतना, नगरवासी व जनप्रतिनिधिपिंसं जानाः यानाच्वंगु अनुगमनया ल्याखं आः थन कोरोना दुहां वइगु सम्भावना नं म्हो हे जक दु धाःसां ज्यू । थन जिमिसं विदेशं वःपिंत नं पूर्णरुपं निगरानीइ तयागु दु । उमिके कोरोनाया लक्षण छुं नं खनेमदु । मेपिं न्हूपिं विदेशं वःपिं आः मदु । लकडाउनया इलय् छम्ह निम्ह मेगु जिल्लां दुहां वःपिं दुगु खःसां उमित नं निगरानीइ तयातयागु दु ।

थ्व इलय् जनप्रतिनिधिपिंसं गुकथं ज्या यानाच्वंगु दु ?
कोरोना भाइरस संक्रमण नियन्त्रणया निंतिं गथे स्वास्थ्यकर्मीत, सुरक्षाकर्मीत फ्रन्ट लाइनय् च्वनाः ज्या यानाच्वंगु दु धाइ, अथे जनप्रतिनिधित नं फ्रन्ट लाइन हे च्वनाः सक्रिय जूगु खः । यदि संक्रमण दुपिं लुत धाःसा थःपिंत नं संक्रमण जुइफुगु खतराया दथुइ नं जनप्रतिनिधिपिंसं अज्याःपिं मालेगु, डाटा कलेक्सन यायेगु निंतिं न्ह्यःने च्वनाः हे ज्या याःगु दु । थ्व धुंकाः लकडाउनया इलय् समस्याय् लाःपिंत राहत इनेगु ज्याय् नं जनप्रतिनिधिपिं न्ह्यःने हे च्वनाः ज्या यानाच्वंगु दु ।

विदेशं वःपिंपाखें अप्वः खतरा दु धाइ, किपुली थथे विदेशं वःपिं गुलि दु ले ?
जिमिसं चैत ११ गते तक कयाःगु डाटा कथं मुक्कं ७७ म्ह विदेशं वःपिं दु । उमित होम क्वारेन्टाइनय् तयाः जि थम्हं हे उमिगु स्वास्थ्य स्थिति बारे फोनं जानकारी कयागु खः । ११ गते लिपा किपुली विदेशं दुहां वःपिं मदु । छुं न्हि न्ह्यव त्रिशुलीं व कोहल्पुर निम्ह स्वम्ह दुहां वःगु खः । उमित नं निगरानीइ तयागु दु । थ्व ल्याखं आः किपू संक्रमणया खँय् सुरक्षित अवस्थाय् दु धायेमाः ।

राहतया ज्या गुकथं न्ह्यानाच्वंगु दु ले ?
न्हापांगु चरणया राहत इनेगु ज्या थौं क्वचायेत्यंगु दु । जिमिसं दयेकागु मापदण्ड कथं नगरया फुक्कं वडाय् राहत इनेज्या यानागु दु । आःतक किपू नगर दुने ४११७ परिवारयात राहत इनागु दु ।

राहत इनेगु ज्याय् मेमेगु नगरय् नये–त्वने दुपिंसं नं काःवल धयागु खँ दु, अथेहे न्हि खानाः नयेमाःपिं जूसां थन हे छेँ दुपिंसं धाःसा राहत काये मखन धयागु नं खँ वयाच्वंगु दु । किपुली गुकथं राहत वितरण जुल ?
जिमिसं राहत वितरणय् नं बांलाक अनुगमन यानागु दु । थन छेँ दुपिं स्थानीय जुइमा वा बालं च्वनाच्वंपिं जुइमाः राहत कायेगु मापदण्डय् लाःपिं जुल धाःसा छेँ दुपिंत नं बियागु दु, बालं च्वंपिंत नं बियागु दु । स्थानीय मनूया छेँ दुसां ज्या मदुगुलिं नयेत्वनेत समस्या जुइफु, अज्याःपिंत नं जिमिसं राहत बियागु दु । राहत बीगु इलय् नं वडा वडाय् राजनीतिक संयन्त्र दयेकाः हे यानागु दु । न्हापांगु चरणया राहत बी क्वचायेधुंकाः आः राहत काःपिंसं जायेकाहःगु फारमया नं अध्ययन याना स्वयेगु जुइ । कन्हय् कार्यपालिकाया बैठकय् राहत वितरणयात कयाः समीक्षा नं जुइ ।

लकडाउन थप जुइगु खँ वयाच्वंगु दु, लिपाया निंतिं गज्याःगु तयारी जुयाच्वंगु दु ले ?
विशेषतः लकडाउनया इलय् समस्या जुइफइगु धयागु खाद्यान्न व नियमित स्वास्थ्य जाँच सम्बन्धी खः । जिमिसं लकडाउन न्ह्यः कयागु डाटा कथं किपुली खुद्रा व थोक व्यापारीतय्सं स्वलायात गाक्क खाद्यान्न स्टक तयातःगु दु । थ्व ल्याखं छवाः निवाः थप लकडाउन जूसां खाद्यान्नया समस्या जुइगु खनेमदु । उकिसनं जिमिसं साल्ट ट्रेडिङ खाद्यान्न हयाः राहत इनागु जूगुलिं थुकिं नं थप खाद्यान्न किपुली दुहां वःगु दु । नियमित स्वास्थ्य जाँचया निंतिं थन छुं छुं वडाय् छँेय् छेँय् वनाः हे सुगर जाँच, ब्लड प्रेसर जाँच यायेगु ज्या न्ह्यायेधुंकूगु दु । थ्व बाहेक अनुगमन, निगरानी सम्बन्धी ज्या ला नियमित रुपं जुयाच्वंगु दु। थप राहतयात कयाः कार्यपालिकाया बैठकं न्हूगु रणनीति दयेकीगु जुइ ।

नगरपालिकां क्वारेन्टाइन दयेकेगु धयागु नं खँ दुगु खः नि ।
खः जिमिसं प्रत्येक वडाय् क्वारेन्टाइन दयेकेगु धकाः तयारी यानागु खः । थुकिया निंतिं थाय् नं ल्ययागु खः । तर आः जिमिसं बिस्कं बिस्कं क्वारेन्टाइन दयेकेगु पलेसा केन्द्रीकृत यानाः दयेकेमाःगु आवश्यक तायेकागु दु । बिस्कं बिस्कं क्वारेन्टाइन दयेकेबलय् विश्व स्वास्थ्य संगठनया मापदण्ड कथं जुइमखु । मापदण्ड कथं स्थानीय सरकारं दयेकेफइमखु । उकिं स्वनिगःया नगरपालिकातय् फोरमं हे बैठक च्वनाः मापदण्ड कथं क्वारेन्टाइन दयेकेत संघीय सरकारं नं ग्वाहालि यायेमाल धकाः माग यायेगु दु । स्थानीय निकाय क्वारेन्टाइन दयेकेत थाय् बीत तयार दु । क्वारेन्टाइन्ट दयेकेत म्होतिं नं एमडी चिकित्सक छम्ह माल । स्थानीय तहय् थज्याःगु जनशक्ति दइमखु । त्वाःत्वालय् क्वारेन्टाइन दयेकेबलय् स्थानीययात नं खतरा जुइफु । उकिं केन्द्रीकृत क्वारेन्टाइन दयेकेगु पाखे वनाच्वंगु दु । थुकिया निंतिं जिमिसं त्रिवि परिसरय् लाःगु चिकित्सा शिक्षण अस्पतालया जनस्वास्थ्य विभागया छगू भवनय् क्वारेन्टाइनया निंतिं आवश्यक तयारी नं यायेधुनागु दु । म्हिगः तकया दुने थन ३५ गू बेड तयेधुनागु दु । अथेहे संक्रमिततय्त उपचार हे यायेमाःसा धकाः त्रिवि दुनेहे लाःगु राष्ट्रिय आयुर्वेदिक अनुसन्धान तथातालिम केन्द्रया भवनयात सिफारिस यानागु दु । थन उकुन्हु सिडिओ वयाः स्वया नं झायेधुंकूगु दु ।

त्रिवि परिसर दुने लाःगु जनस्वास्थ्य विभागय् दयेकातःगु क्वारेन्टाइन कक्ष ।

अन्तय् छुं धायेगु ?
आःया अवस्थाय् स्वनिगलय् खतरा म्हो हे दुगु खनागु दु । उकिं भ्याली दुने लकडाउन छक्वल‌ं पूवंक चायेकेगु मखुकी बुलुहुँ गतिविधि न्ह्याकायंकेमाःगु खनेदु । वंगु चैत २४ गते च्वंगु स्वनिगःया नगरपालिकातय् संगठन नगरपालिका फोरमया बैठकं नं भ्याली दुने बुलुहुं गतिविधि न्ह्याका यंकेत सुझाव बिउगु दु । आःयात स्वनिगः दुहां वइगु फुक्क नाकायात बन्द यानाः थनया गतिविधि बुलुहुँ न्ह्याकेमाः । थुकिया निंतिं त्वाःत्वालय् तयातःपिं सुरक्षाकर्मीतय्त स्वनिगः दुहां वइगु नाका नाका तयाः कडा निगरानी याके बीमाः । स्वनिगः पिने ग्यानापुगु थासय् बांलाक निगरानी यायेमाः । स्वनिगलं पिने च्वंपिंत थःगु थासय् वने चाहे जूसां उमित छ्वयेगु व्यवस्था यायेमाः ।