११ गू भाषाया मंकाः गठबन्धन
येँ -भाषा आयोगं सरकारयात लःल्हाःगु प्रतिवेदन कार्यान्वयन यायेत थीथी भाषिक समुदायतय्सं माग याःगु दु । उकिया लागिं भाषिक समुदायतय् दथुइ थवंथवय् सहलह ब्याकेगु नं शुरु जूगु दु ।
भाषा आयोगपाखें लःल्हाःगु प्रतिवेदन सरकारं लःल्हाना काःसां आः तक उकियात सार्वजनिक तकं मयाःनि । सरकारं आः तक रिपोर्ट सार्वजनिक तकं मयाःनिगु कारणं थुकिया कार्यान्वयनया सवालय् शंका ब्वलंगु खँ धाःगु दु ।
आयोगया प्रतिवेदन कार्यान्वयन याकेत माःगु पहल यायेगु लागिं आयोगं याःगु सिफारिसय् दुथ्याःगु ११ गू भाषालिसे सम्बन्धित खलः पुचःतय् दथुइ सहलह जूगु खः । थ्व ११ गू भाषिक समुदायतय्सं आवश्यक पहल यायेगु लागिं छगू समन्वय समिति नं गठन याःगु दु । आःयात थ्व समितिया संयोजन किरात याक्थुम चुम्लुङपाखें यानाच्वंगु दु ।
थ्व ११ गू भाषिक समुदायय् नेवाः भाय् लिसें तामाङ, गुरुङ, थारु, राई, मैथिली, मगर, भोजपुरी, बज्जिका, अवधि व डोटेली भाषात दुथ्याः । देय्या थीथी ७ गू प्रदेशय् थ्व भाषात नं सरकारी छ्यलाबुलाया भाय् कथं छ्यले दइगु सिफारिस भाषा आयोगं याःगु खः ।
उकथं हे बागमति प्रदेशय् नेवाः व तामाङ भाय्यात सिफारिस याःगु जुयाः बागमति प्रदेशया हकय् नेवाः देय् दबू व तामाङ घेदुङया मेगु पुचः नं गठन जूगु दु । थ्व निगू जातिं बागमति प्रदेशय् भाषा आयोगया रिपोर्ट लागू याकेत पहल याइगु खँ धाःगु दु ।
भाषा आयोगं १ नम्बर प्रदेशय् छुं छुं राई जातिया भाय्यात सिफारिस मयाः धकाः जनजाति महासंघं रिपोर्टया विरोध याःगु खःसां भाषिक समुदायतय्सं धाःसा रिपोर्टय् मिले मजूगु खँ लिपा समाधान यायेगु कथं आः मिले जूगु खँयात कार्यान्वयन याना वने माःगु खँय् बः बिउगु दु ।
रिपोर्ट बारे नेवाः सरोकार
भाषा आयोगं बिउगु रिपोर्ट कार्यान्वयन याकेगु बारे नेवाः खलःतय्सं नं सरोकार क्यना हःगु दु । आयोगं बागमति प्रदेशय् खस नेपाली भाय्या अतिरिक्त नेपालभाषा व तामाङ भाषायात नं सरकारी ज्याखँय् छ्यले फइ धकाः सिफारिस याःगु खः । उगु सिफारिसयात नेवाः खलः पुचःतय्सं समर्थन याःगु दु । आः थ्व प्रतिवेदन लागू याकेगु लागिं नं नेवाः खलः पुचःतय्सं सक्रियता क्यना हःगु दु ।
नेवाः समुदायपाखें थ्व विषयय् पहल यायेत नेवाः देय् दबू सक्रिय जुयाच्वंगु दु । थ्वहे विषयय् सहलह यायेत नेवाः देय् दबूपाखें आइतवाः थीथी खलः पुचःया प्रतिनिधि लिसें भाषा आन्दोलनया अभियन्तातय्त सःताः सहलह ब्याकेत्यंगु दु । भाषा आयोगपाखें रिपोर्ट सार्वजनिक यायेवं नेवाः खलः पुचःतय्सं उकियात याकनं माःगु कानून दयेकाः कार्यान्वयन याकेत बः बियाच्वंगु दु । थुकिया लागिं आवश्यक जुल धाःसा संघीय व प्रदेश सरकारय् वनाः नं इनाप याये मालीगु खँ धाःगु दु ।
LEAVE YOUR COMMENTS