ने. सं. ११४६ बछलागा तृतीया -

भाषा आयोगय् अपमानया उजुरी

येँ (नेपालभाषा टाइम्स)- गायक कुमाः सागरया म्येयात अश्लील रुपं व्यंग्य यानाः सार्वजनिक याःपिं हास्य कलाकारतय्त कारवाही यायेमाः धइगु माग यानाच्वंपिं अभियन्तातय्सं म्हिगः भाषा आयोगया ज्याकुथिइ वनाः थःगु माग न्ह्यब्वल । अन्तर्राष्ट्रिय मांभाय् दिवसया लसताय् आयोगया ज्याकुथिइ जुयाच्वंगु ज्याझ्वलय् हे वनाः वय्कः–पिंसं मांभाय्या अपमान याःपिं मनूतय्त कारवाही यायेमाः धकाः थःगु खँ तयादीगु खः ।

उगु इलय् थःगु खँ तसें अभियन्ता रवि शाक्यं थःगु मांभाय्या अपमान याःपिं विरुद्ध छु याये माली धकाः आयोगया प्रवद्ध विद्वानतय्सं न्ववाना बीत इनाप यानादीगु खः । आयोगया अध्यक्ष डा. गोपाल ठाकुरं थ्व विषयय् आयोगपाखें आवश्यक भूमिका म्हिते धकाः लिसः बियादीगु खः ।

थ्वहे झ्वलय् भाषा विज्ञान केन्द्रीय विभागया सहप्राध्यापक डा. तारामणि राईं नं फरक भाषा न्ववाइम्ह वक्ताया भाषायात कयाः गिजे यायेगु धइगु भाषिक हिंसा व भाषिक मानव अधिकारया हनन समेत खः धयादीगु दु । विहीवाः नेपाल प्रज्ञा प्रतिष्ठानया ग्वसालय् जूगु ज्याझ्वलय् न्ववासें वय्कलं भाषाय् टोन वः धकाः गिजे यायेगु ज्यायात हलुका ढंगं काये मजिउ व थुकियात दण्डनीय दयेकेमाः धयादिल ।

संसारया न्ह्यागु थासय् नं छगू मांभाय् ल्हाइम्ह मनुखं मेगु भाय् ल्हायेसातकि अन न्हापांगु भाय्या लिच्वः निगूगु भाषाय् लाइगु भाषा विज्ञानया सामान्य नियम हे खः धासें थ्व खँयात हास्यया विषय दयेके मजिउगु खँ नं वय्कलं धयादिल । नेपालय् थज्याःगु घटना तःगू हे थासय् जुइधुंकूगु कारणं आः थुकियात गम्भीर रुपं कयाः कानुन हे दयेकेत दबाब बीमाःगु बिचाः नं वय्कलं तयादिल ।

थ्वहे झ्वलय् कुमाः सागरया म्येयात अश्लील ढंंगं व्यंग्य याःपिं हास्य कलाकारतय्त म्हिगः ज्वनेगु धकाः प्रहरीं धाःगु खःसां ज्वने धाःसा मफुनिगु खँ धाःगु दु । प्रहरीइ उजुरी तःपिं अभियन्तातय्सं म्हिगः येँया जिल्ला प्रहरी कार्यालयय् स्वापू तःबलय् प्रहरीं थ्व कलाकारत म्हिगः पोखराय् दुगु व येँय् लिहां वयेवं हे प्रहरी कार्यालयय् हाजिर जुइ धाःगु खँ अभियन्ता श्यामकृष्ण प्रजापतिं कनादिल ।

थ्वहे झ्वलय् थ्व स्वयां न्ह्यः नेवाः–तय्त अपमान याःगु खँय् कारवाहीलय् लाःम्ह कलाकार अपूर्व क्षितिजं नं आः अपमान याःम्ह साजन श्रेष्ठयात समर्थन समर्थन यानाः न्ववाना हःगु दु ।