ख्वपय् मूपात्र जात्रा शुरु
ख्वप – येँयाःपुन्हिया झ्वलय् थन पिहां वइगु मूपात्र जात्रा म्हिगःनिसें शुरु जूगु दु । येँया झ्वलय् दँय्दसं यंलागा दुतियानिसें चौथि स्वन्हुयंकं पिहां वइगु धार्मिक व सांस्कृतिक महत्व दुगु मूपात्र जात्राय् राक्षसया प्रतिककथं कायेगु याइ । उकिं थ्व जात्रायात राक्षसया जात्रा नं धायेगु याः ।
थनया साःक्वलान त्वालय् च्वंपिं साय्मितय्सं दत्तात्रयय् च्वंगु भिंद्यःया देगलय् त्रिशुल आकारया निगू यांमत च्याकेवं स्वन्हुयंकंया मूपात्रा जात्रा शुरु जुइ । यांमतया च्वकाय् त्रिशुलया आकार थें स्वगू च्वः पिहां वयाच्वंगु दइसा व हे च्वकाय् मत च्याकेगु यात हे यांमत धाइगु खः ।
मूपात्रा जात्राय् मुख्य पात्रया रुपय् राक्षस व निम्ह सहायक राक्षसया रुपय् राक्षसया हे वसः पुंकाः ख्वालय् थीथीकथंया रंग इकाः समाः यानाः ल्वाभःया रुपय् तरवार ज्वंकाः ख्वप देय् चाःहिकेगु याइ ।
किंवदन्तीकथं स्वर्गय् इन्द्रया मांयात बसुन्धरा धलं दनेत पालिजाः स्वां माःगु व उगु स्वां कायेत इन्द्रं थः काय जयन्तयात छ्वया हइगु खः । पालिजाः स्वां मामां वनेगु झ्वलय् दैत्यतयेगु क्यबय् वनाः स्वां थ्वयाच्वंगु इलय् राक्षसतय्सं खंकाः जयन्तयात निपां ल्हाः लिउने यंकाः चिना तइगु व वयात त्वतकेत वःपिं देवगणलिसें राक्षसतय् दथुइ तःधंगु संग्रामय् राक्षसतय्त बुकाः इमित सहरया जनताया दथुइ चाःहिकूगुया रुपय् थ्व जात्रा हनेगु याना वयाच्वंगु धइगु धापू दु ।
यद्यपि थ्व जात्रा देवराज इन्द्र नाप स्वापू दुसां मूपात्र जात्रा धाःसा द्वापरयुगंनिसें हे संचालन वःगु नं धयातःगु दुसा मल्लकालय् ख्वपया जुजु जगतप्रकाश मल्लं देवीपुराण् पुद्यपुरातया बाखंया लिधंसाय् चले याना वयाच्वंगु धइगु नं धापू दु ।
जात्राया न्हापांगु न्हिकुन्हु तचपाल त्वालय् च्वंम्ह सलां गणेद्यःयात खतय् तयाः जात्रा यानाः सहर परिक्रमा याइसा निन्हुया दिंकुन्हु चोछेँ त्वालय् च्वंम्ह छुमां गणेद्यःया मूर्तिसहित खः लाय्कुलिइ तलेजु भवानीप्रति भक्तिभाव अर्पण यानाः मत च्याकाः नगर परिक्रमा याइ । जात्राया दकलय् लिपांगु दिंकुन्हु गुथि संस्थानं हःगु बलिसहितया पुजा यायेधुंकाः क्वःनेया साय्मितय्सं बुलुचा धइगु थासय् यांमत च्याकाः भैरवया जात्रा यानाः नगर परिक्रमा यासें जात्रा क्वचायेकी ।
LEAVE YOUR COMMENTS