राष्ट्रपतिं नागरिकता विधेयक थाकेदइमखु ः दाहाल

येँ (नेपालभाषा टाइम्स)- सत्तारुढ माओवादी केन्द्रया अध्यक्ष पुष्पकमल दाहालं प्रतिनिधिसभा व राष्ट्रिय सभां पारित जूगु नागरिकता विधेयक राष्ट्रपतिपाखें प्रमाणीकरण यायेगु ज्या लिबाक मखु जुइ धयादीगु दु । म्हिगः जापानं लिहां वयेगु झ्वलय् त्रिभुवन अन्तर्राष्ट्रिय विमानस्थलय् पत्रकारतलिसे खँ ल्हासें वय्कलं उगु खँ धयादीगु खः । दाहालं राष्ट्रपतिपाखें विधेयक प्रमाणीकरण यायेमाःगु व पनेगु ज्या याये मजिउगु पक्षय् थः दु धासें धयादिल, ‘नागरिकता विधेयक राष्ट्रपतिं पनी मखु जुइ धइगु जितः ताः, लिबाके म्वाःगु खः ।’

संघीय संसदया निगुलिं सदनं पारित जुइधुंकूगु नागरिकता विधेयक राष्ट्रपति भण्डारीं प्रमाणीकरण मयासे च्वनाच्वंगु खःसा राष्ट्रपतिया उगु ज्यायात कयाः आलोचन नं जुयाच्वंगु दु । सरकारं निगुलिं सदनं पारित यायेधुंकाः उगु विधेयक साउन १५ गते राष्ट्रपति ज्याकुथिइ प्रमाणीकरणया नितिं छ्वःगु खः ।

राष्ट्रपति भण्डारीं धाःसा नागरिकता विधेयक बारे थम्हं विचार यानाच्वनागु धकाः धायेगु यानाच्वंगु दुसा विधेयक प्रमाणीकरण मयायेत व प्रमाणीकरण यायेगु धकाः राष्ट्रपतियात थीथी क्षेत्रं दबाब बियाच्वंगु दु । थ्वहे झ्वलय् छुं कानुन व्यवसायीतय्सं नं यदि राष्ट्रपति भण्डारीं थ्व विधेयक प्रमाणीकरण यात धाःसा सर्वोच्च अदालतय् मुद्दा दायर यायेगु तयारी नं यानाच्वंगु दु ।

मेखे माओवादी केन्द्रया अध्यक्ष दाहालं धाःसा राष्ट्रपति भण्डारीं विधेयक लित छ्वया हये मजिउ धासें लाखौ नेपाःमितय् मां अबु नेपाली नागरिक जुयाच्वंसां नं उमि नागरिकता कायेत उमेर गाःपिं काय् म्ह्याय्पिसं नागरिकता काये मफयाच्वंगुलिं आपालं सुविधां बञ्चित जुयाच्वंगु धासें थज्याःगु स्थितियात सम्बोधन यायेगु नितिं विधेयक हयागु खँ कनादिल संविधानया धारा ११३ सं प्रमाणीकरणया नितिं राष्ट्रपतिया थाय् छ्वःगु विधेयक झिंन्यान्हुया दुने प्रमाणीकरण यानाः उकिया सुचं निगुलिं सदनयात बीमाःगु व्यवस्था दु ।