ने. सं. ११४४ चौलाथ्व दशमी -

प्रदेश ७ य् हानं राजधानी विवाद

धनगढीया राजधानी गोदावरी यंकूगुलिं डोटी बन्द

येँ – थःगु थासय् राजधानी मतःगु खँय् विरोध यासें धनगढीया स्थानीय वासिन्दां प्रदर्शन याःगु दु । प्रदेश नम्बर ७ या राजधानी संसदीय समितिं गोदावरी नगरपालिकाय् तयेगु निर्णय यायेवं म्हिगः उगु प्रदर्शन जूगु खः । धनगढीइ राज्यपाखें तःधंगु सम्पत्ति लगानी यायेधुंकूगु अवस्थाय् भूमाफिया व वन तस्करतय्सं न्हूगु थासय् राजधानी यंकूगु द्वपं स्थानीय जनतां बिउगु दु ।

धनगढी उपमहानगरपालिकाया प्रमुख नृपबहादुर वडुं राज्यया करोडौं लगानी धनगढीइ जुइधुंकूगु खँ कँसें सुनियोजित रुपय् तस्करतलिसे जानाः वन फडानी यायेगु योजना सहित राजधानी तोके याःगु गलत खः धयादिल । प्रदेश नम्बर ७ या स्थानी राजधानी व नां तयेगु निंतिं गठन जूगु विशेष समितिं मंगलवाः प्रदेश सभाय् प्रतिवेदन बिउगु खः ।

संसदीय समितिं प्रदेशया राजधानी गोदावरीइ तयेगु व प्रदेशया नां ‘सुदूरपश्चिम’ तयेगु धकाः सुझाव बिउगु खः । ७ नम्बर प्रदेशया राजधानी सारे यायेगु निर्णय विरुद्ध डोटीइ नं आन्दोलन न्ह्याकीगु जूगु दु । बुधवाः डोटीया सिलगढीइ च्वंगु सर्वपक्षीय बैठकं आन्दोलनया ज्याझ्वः क्वःछिसें दिपायल सिलगढीया छेँय् छेँय् हाकुगु ध्वाँय् ब्वयेकेगु व समितिया प्रतिवेदन च्याकेगु खँ धाःगु दु ।

अथेहे थौं ११ बजे जुलुस प्रदर्शनया लिसें जिल्ला प्रशासन ज्याकुथी धर्ना बीगु, बहनी कोण सभा व मशाल जुलुस पिकायेगु ज्याझ्वः क्वःछिउगु दु । कन्हय् डोटी अनिश्चितकालीन बन्द यायेगु निर्णय नं बैठकं याःगु दु । सर्वपक्षीय बैठकय् राजनीतिक दलया प्रतिनिधि, स्थानीय तहया जनप्रतिनिधि, नागरिक समाजया प्रतिनिधिपिंसं ब्वति काःगु खः ।

प्रदेशया राजधानी दिपायल जुइमाःगु माग यासें थ्वया न्ह्यः नं अन प्रदर्शन जूगु खः । उगु इलय् खुइप्यन्हु तक प्रदर्शन जूगु खः । आः नं
थःगु मागप्रति प्रदेश सरकारं वेवास्ता याःगु धासें आन्दोलनया घोषणा याःगु खः ।