‘माल धाःसा महाभियोग फये तर राजीनामा बी मखु’

येँ- प्रधानन्यायाधीश चोलेन्द्र शम्शेर जबरां माल धाःसा थः महाभियोग हे फयेत नं तयार दु, तर पदं राजीनामा धाःसा बी मखु धयादीगु दु । थःगु बारे यक्व पिहां वयाच्वंगु विवादयात कयाः म्हिगः बीबीसी नेपाली सेवालिसे जूगु खँल्हाबल्हाय् वय्कलं थ्व खँ धयादीगु खः । पिनें राजीनामा माग याना हयेवं तुं थम्हं राजीनामा बीमाःगु आवश्यकता मदु धासें वय्कलं थः संवैधानिक लँपुपाखें वयाम्ह जूगुलिं संवैधानिक लँपुं हे जक पिहां वनेगु जुइ धकाः नं स्पष्ट यानादिल । थःगु बारे यक्व विवाद वःसां मिडियापाखें तापाक च्वंच्वनादीम्ह वय्कलं म्हिगः बल्ल बीबीसीलिसे खँल्हानादीगु खः ।

वय्कलं न्यायालयय् च्वनाः छुं नं मखुगु ज्या यानागु मदु धासें राजीनामा मबीगु खँ स्पष्ट यानादीगु खः । यदि राजनीतिक दलतय्सं थः विरुद्ध महाभियोगया प्रस्ताव हल धाःसा थः उकिया सामना यायेत तयार दुगु खँ नं धयादीगु खः ।