जगत सुन्दर ब्वनेकुथिया ३३ दँ बुन्हि
येँ(नेपालभाषा टाइम्स)- मांभासं शिक्षा बीगु तातुनाः दकलय् न्हापां चायेकूगु जगतसुन्दर ब्वनेकुथि ३३ दँ क्यंगु दु । थ्व लसताय् वंगु फागुन १२ गते शुक्रवाः ब्वनेकुथिया थःगु हे सभाकक्षाय् बुन्हि हना ज्याझ्वः जुल ।
ब्वनेकुथि संचालक समितिया नायः प्रा. डा. चुन्दा वज्राचार्यया सभापतित्वय् जूगु बुन्हि हना ज्याझ्वलय् मूपाहांकथं लुम्बिनी बौद्ध विश्वविद्यालयया पुलांम्ह उपकुलपतिलि, बौद्ध विद्वानलिसें इतिहासविद् प्रा. डा. त्रिरत्न मानन्धर झायादीगु खः ।
मूपाहांपाखें त्वाःदेवाय् मत च्याकाः उलेज्या यानादीगु ज्याझ्वलय् ब्वनेकुथिया प्रिन्सिपल सुनिता मानन्धरं लसकुस यानादीगु खः । ज्याझ्वलय् ब्वनेकुथिइ नीन्यादँ तक सेवा यानादीम्ह लेखापाल विजयरत्न वज्राचार्य, स्यनामि रोशना शाक्ययात म्हतिं छगू छगू लख व नीदँ तक शिक्षणय् योगदान बियादीम्ह नारायणदेवी मानन्धरयात चय्द्वः तका दांलिसें हनेज्या याःगु खः । वय्कःपिंत मूपाहां प्रा. डा. मानन्धरं हनापौ लःल्हानादीगु खःसा सभानायः प्रा. डा. वज्राचार्यं दां व पाहांकथं झायादीम्ह नेपालभाषा केन्द्रीय विभागया प्रमुख सह प्रा. राजनलाल जोशीं खादा क्वखायेकादीगु खः ।
थुकथं हे ज्याझ्वलय् लायन्स क्लब अफ हारतीमाताया समन्वयय् येँ महानगरपालिकापाखें ब्वनेकुथिया निंतिं बजेट विनियोजन यानादीम्ह येँ महानगरपालिकाया निर्देशकलिसें वित्त विभाग प्रमुख बुद्धरत्न मानन्धरयात दोसल्ला न्ययेकाः हनेज्या याःगु खः ।
अथे हे २०७८ सालया एसइइ परीक्षाय् नेपालभाषा विषयय् दकलय् अप्वः ल्याः हयादीम्ह ब्वनेकुथिया पूर्णिमा तुलाधर व लूजः खड्गीयात विरञ्ची मोतिमाया व शान्ति सिरपाः नं लःल्हाःगु खः । वय्कःपिंत मूपाहांपाखें दसिपौ लःल्हाःगु खःसा दाता गुह्येश्वरीराज मानन्धर व दाता शान्ति मानन्धरयापाखें ज्ञानेन्द्र मानन्धर दां सिरपाः व गुथिया माया मानन्धरं पदक लःल्हानादीगु खः ।
२०७८ सालया एसइइ परीक्षा उत्तीर्ण ब्वनेकुथिया ब्वँमिपिंत लुमन्ति चिं व सिरपाः लःल्हाःगु ज्याझ्वलय् ब्वनेकुथियात थीथी कथं ग्वाहालि यानादीपिं नं सुभाय् पौ लःल्हाःगु खः ।
मूपाहां प्रा. डा. मानन्धर, विशेष पाहां नेपालभाषा केन्द्रीय विभागया प्रमुख सह प्रा. जोशी, सिरपाःया दातापिंसं नुगःखँ प्वंकादीगु ज्याझ्वलय् ब्वनेकुथिया विद्यार्थीपिंसं थीथी सांस्कृतिक ज्याझ्वः नं न्ह्यब्वःगु खः ।
LEAVE YOUR COMMENTS