प्रेस काउन्सिलया ऐन संशोधन जुइगु

यल – प्रेस काउन्सिल नेपालया विद्यमान ऐनयात संशोधन याइगु जूगु दु । ऐन संशोधन यायेगु ल्याखं प्रेस काउन्सिलया ग्वसालय् छगू ‘प्रेस काउन्सिल ऐन संशोधन’ विषयय् छगू सहलह ज्याझ्वः जुल । यलया गोदावरी भिलेज रिसोर्टय् जूगु ज्याझ्वःया उलेज्या सर्वोच्च अदालतया कामु प्रधानन्यायाधिश दीपकराज जोशीं यानादीगु खः । ज्याझ्वलय् नवासें कामु प्रन्या जोशीं न्यायालय व पत्रकारिताय् ज्या यायेगु शैली फरक जूसां उद्देश्य धाःसा छगू हे जूगु धयादिल । ‘निम्हेसिगुं उद्देश्य छगू हे खः, सत्य मालेगु’, वय्कलं धयादिल, ‘लोकतन्त्रय् जनताया सतिक च्वनेगु व जनतां विश्वास याइगु क्षेत्र पत्रकारिता खः ।’

पेशातगत उच्चतम आचरण कायम तयाः स्वस्थ, स्वतन्त्र व उत्तरदायी पत्रकारिता विकास व संवद्र्धन यायेत विद्यमान कानुनी संयन्त्र व प्रावधान अपर्याप्त जूगु धइगु महसुस यानाच्वंगु इलय् ऐनयात ईकथं ल्पय्क संशोधनया निंतिं सहलह यायेगु बांलाःगु ज्या जूगु वय्कलं धयादिल । प्रेस काउन्सिलया कार्यवाहक अध्यक्ष किशोर श्रेष्ठं २६ दँ न्ह्यः दयेकूगु छापा संचारमाध्यम केन्द्रीत प्रेस काउन्सिल ऐनयात संशोधन यानाः अराजक जुयाच्वंगु अनलाइन पत्रकारितायात दायराय् हयेगु नापं संचारयात नियन्त्रण मखसे नियमन यायेगु लगायतया व्यवस्था यायेमाःगु आवश्यक जू धयादिल ।