२० क्वःगु ज्यापु दिवस तःजिक हन
येँ (नेपालभाषा टाइम्स)÷यःमरि पुन्हि कुन्हु लाकाः म्हिगः येँय् नीक्वःगु ज्यापु दिवस न्यायेकल । थ्व लसताय् थनया त्यंगलं छगू ¥याली पिकासें बसन्त–पुलिइ सभा जुल । सभाय् मूपाहां कथं प्रधानमन्त्री पुष्पकमल दाहालं ब्वति कयादीगु खः ।
ज्याझ्वलय् प्रम दाहालं नेपाःया विविध जाति, भाषाभाषी व सस्कृति हे नेपाःया मौलिक व गौरव खः धासें थुकिया जगेर्ना यायेगु झी फुकसियां जिम्मेवारी खः धयादिल । नखः चखः, जात्रा पर्व व सांस्कृतिक सम्पदा व गतिविधि नेपाःया अमूल्य सम्पत्ति खः धासें वय्कलं नेपाः जातीय, भाषिक, धार्मिक सांस्कृतिक विवधतां जाःगु देय् जूगुलिं फुक्कं समुदायं संस्कृतियात जीवनया अभिन्न अंगया रुपय् काःगु खँ नं धयादिल ।
सभा न्ह्यः थनया त्यंगः त्वालं आपालं बाजागाजा, थःथःपिनि त्वाःया ब्यानर सहित ¥याली शुरु जूगु खः । ज्यापु संस्कृति विकास कोषया ग्वसालय् थ्व दिवस न्यायेका वयाच्वंगु खः । कोषया नायः मंगलकृष्ण सिंहया सभापतित्वय् जूगु उगु ज्याझ्वलय् २० क्वःगु ज्यापु दिवसया संयोजक लिसें त्यंगः त्वाः खलःया अध्यक्ष धनबहादुर महर्जनं लसकुस यानादीगु खः । ज्याझ्वलय् थीथी व्यक्तियात हनेगु लिसें सिरपाः बीगु ज्या नं जूगु खः ।
LEAVE YOUR COMMENTS