सांसदतय्त मोहनिया भत्ता बन्द

येँ – सरकारं थुगुसी सांसद व सांसदया पीएतय्त मोहनिया भत्ता मबीगु जूगु दु । थगुने सरकारं सांसदतय्त मोहनि भत्ता बीगु व्यवस्था याःगु खःसा उकियात कयाः तच्वकं विरोध जुइवं सांसदतय्सं थःपिंसं कायेधुंकूगु भत्ता धमाधम लित बिया हःगु खः ।संघीय संसद सचिवालयया कथं सांसद व पीएतय्त असोज महिनाया तलब धाःसा छ्वयेधुंकूगु दु ।

सचिवालयं धाःकथं सांसदतय्त मोहनि भत्ता बीगु नितिं मन्त्रिपरिषदं छुं नं कथंया निर्णय मयाःगु व अर्थ मन्त्रालयं मोहनि भत्ताया नितिं बजेट मफ्याःगुलिं सांसद व उमि पीएतय्त तलब जक छ्वःगु खः ।

असोज महिनाया तलब कथं सांसदतय्त २ करोड ९८ लाख ४६ हजार तका छ्वःगु दुसा पीएया तलब कथं करोड ४२ लाख ७४ हजार तका तलब छ्वःगु खः । थुकी यातायात व बैठक भत्ता धाःसा दुमथ्याः ।

२०७६ भदौ ३१ गते च्वंगु मन्त्रिपरिषद् बैठकया निर्णय कथं सांसदतय्त मोहनिया भत्ता नं बीगु याना वयाच्वंगु खः । वहे कथं थगुने सांसदतय्त नियमित कथं मोहनि भत्ता छ्वःगु खःसा कोरोना संक्रमणया इलय् जनतायात वासः यायेत ध्यबा मदु धायेगु तर सांसदतय्त धाःसा मोहनिया भत्ता नकल धकाः सार्वजनिक रुपं विरोधया सः थ्वयेवं सांसदतय्सं थःपिंसं कायेधुंकूगु भत्ता धमाधम लित बियाहःगु खः । उगु इलय् नेकपा, नेपाली कांग्रेस व जनता समाजवादी पार्टीं संस्थागत रुपं हे निर्णय यानाः भत्ता लित बीगु धकाः घोषणा याःगु खः ।

संसद सचिवालय सूत्रं धाःकथं थगुने भत्ता लित बिउगु खःसां थुगुसी धाःसा आपालं सांसदतय्सं थःपिंत मोहनिया भत्ता नं बीमाः धकाः संसद सचिवालययात दबाब बियाच्वंगु दु । छुं ई न्ह्यवंनिसें सांसदतय्पाखें अज्याःगु दबाब वयेगु शुरु जूगु खः । तर सचिवालयं मोहनि भत्ताया नितिं मन्त्रिपरिषद्या निर्णय वल धाःसा व उकिया बारे अर्थ मन्त्रालय सकारात्मक जुल धाःसा जक थःपिंसं भत्ता बी फइ, मखुसा थःपिंसं जक भत्ता बीगु अवस्था मदु धकाः सांसदतय्त जानकारी याकूगु खँ धाःगु दु ।

संघीय सांसदतय्त मोहनिया भत्ता बीगु निर्णय लिपा प्रदेशय् नं सांसदतय्त मोहनि भत्ता बीगु शुरु यायेवं उकियात कयाः सार्वजनिक रुपं विरोध जुयाच्वंगु खः । तर सांसदतय्सं थःपिनिगु तलबं जक जीविका चले यायेत थाकुयाच्वंगु खँ धासें मोहनि थेंज्याःगु तःधंगु नखःया इलय् भत्ता बीमाःगु माग याना वयाच्वंगु खः ।

थ्वहे झ्वलय् सीदु कथं गुलिखे सांसदतय्सं जनप्रतिनिधि जुइपिंसं मोहनिया भत्ता काये मजिउ धकाः लबिङ यानाच्वंगु खँ नं सीदुगु दु । उकथं लबिङ याःपिं सांसदतय्सं थःपिं जनप्रतिनिधि जूगु व कर्मचारीं थें भत्ता काये मजिउ धासें मोहनि भत्ता मबीत सचिवालयय् हे वनाः धाः वनाच्वंगु खँ नं धाःगु दु । मोहनि भत्ताया कारणं सांसदतय् हे बेइज्जत जुयाच्वंगु धासें अज्याःपिं उकियात दिकेमाःगु सः नं तयेगु ज्या जुयाच्वंगु खः ।

सम्बन्धित बुखँ

LEAVE YOUR COMMENTS