येँ महानगर प्रमुख व उपप्रमुखयात हना

येँ- येँ महानगरपालिकाया प्रमुख विद्यासुन्दर शाक्य व उपप्रमुख हरिप्रभा खड्गीयात छगू ज्याझ्वःया दथुइ हनेज्या याःगु दु । नेपाल खड्गी सेवा समितिया ग्वसालय् जूगु छगू ज्याझ्वःया दथुइ महानगर प्रमुख व उपप्रमुखयात हनेबज्या याःगु खः ।

येँ महानगर दुनेया मूर्त अमूर्त सांस्कृतिक, धार्मिक सम्पदा संरक्षण, महानगर दुनेया ब्वनेकुथिइ नेपालभाषा विषय अध्यापन व थीथी सांस्कृतिक बाजं गुरुयात प्रोत्साहन बीकथं सम्मान यायेगु व लोपोन्मुख अवस्थाय् लानाच्वंगु परम्परागत गुथियात निरन्तरता बीगु ल्याखं आर्थिक अनुदान बीगु व गुथि छेँ, द्यः छेँ, सतः, फल्चा आदिया पुनःनिर्माण यायेगु ज्वःमदुगु ज्या याःगु धासें समितिं महानगर प्रमुख व उपप्रमुखयात हनेज्या याःगु खः ।

महानगर प्रमुख शाक्य व उपप्रमुख खड्गी श्रेष्ठयात समितिया महानगर दुनेया बाजं खलः व गुथि यानाः न्हय्न्यागू पुचलं मंकाःकथं हनेज्या याःगु खः । ज्याझ्वलय् खड्गी समुदायया हरेक बाजं खलः व गुथिपाखें सम्मानित प्रमुख व उपप्रमुखयात बुद्ध मूर्ति, नाट्येश्वरया मूर्तिलिसें थीथी उपहार लःल्हानाः सम्मान याःगु खः ।

ज्याझ्वलय् नवासें येँ महानगर प्रमुख शाक्यं महानगर दुनेया मौलिक सम्पदा संस्कृति संरक्षणया निंतिं ध्यबाया म्हो वयेके बीगु ज्या जुइ मखु धयादिल । सम्पदा संस्कृतिया संरक्षण, संवद्र्धन व प्रवद्र्धनया निंतिं ध्यबाया अभाव मदु, महानगरं लगानी याइ धासें वय्कलं धयादिल, ‘महानगरं विवाद वइगु व जुयाच्वंगु थासय् लगानी याइमखु, याये नं फइमखु । थःपिंसं आतक निर्विवाद दक्वं मागयात संबोधन याना वयाच्वनागु दु ।’

‘सम्पदा पुनःनिर्माण यायेगु ज्या महानगरं याइ, उकिया संचालन, संरक्षणया दायित्व समुदायं कायेमाः’ प्रमुख शाक्यं धयादिल, ‘जिमिसं पर्यटनयात स्वानाः स्थानीयवासीया जीवनस्तर थकायेगु ज्याझ्वः न्ह्याकेगु जुइ ।’

उपप्रमुख खड्गी श्रेष्ठं भाषा, कला, संस्कृतियात ल्यंका तये फत धाःसा जक स्वनिगःया मौलिकतायात नं ल्यंका तये फइ धासें उकिया निंतिं महानगरया योजनाय् स्थानीयतय् सहभागिता आवश्यक जू धयादिल ।

समितिया संरक्षक मनोज नेवाः खड्गीं न्यागू करोड तकाया नायः संस्कृति विकास कोष स्थापना यायेगु योजना दुगु व उकी महानगरपाखें छगू करोडया योगदान यानाबीत इनाप यानादिल ।
समितिया नायः अञ्जिता खड्गीया सभापतित्वय् जूगु ज्याझ्वलय् समितिपाखें वइगु मंसिरय् बृहत नाय्खिं बाजंया ब्वज्या यायेत्यनागु नं जानकारी बिउगु खः ।

सम्बन्धित बुखँ

LEAVE YOUR COMMENTS