नाचघरया दबुली कात्ति प्याखं क्यनीगु
यल – यलया कात्ति दबुली क्यनीगु कात्ति प्याखं न्हापांखुसीइ स्टेजय् क्यनीगु जूगु दु । मचां निसें कात्ति प्याखं हुला वयाच्वनादीम्ह कलाकार स्वजन राजवंशीं येँया राष्ट्रिय नाचघरया स्टेजय् कात्ति प्याखंया छगू ब्व न्ह्यब्वयेत्यंगु खः । वय्कलं कात्ति प्याखंया कृष्णलिला अन्तर्गतया उषाहरण बाखनय् छपु प्याखं न्ह्यब्वयेत्यंगु खः ।
राजवंशीं वइगु असार ३ गते जुइगु थःगु एकल नृत्य ब्वज्याय् ३८० दँ न्ह्यवनिसें कात्ति दबुली न्ह्यब्वया वयाच्वंगु कात्ति प्याखंया छगू ब्व नाचघरया स्टेजय् हयेत्यंगु खः ।
स्वजन रघुवंशी एकल साँझ बारे शुक्रवाः ग्वसाः ग्वःगु पत्रकार सम्मेलनय् न्ववासें नृत्य निर्देशक संघ यल शाखाया संरक्षण संजयराज शर्मां परम्परागत प्याखंयात नं छथाय् जक लिकुंका मतसे तब्या यानायंकेमाः धयागु सोच कथं नाचघरया दबुली थ्व प्याखं क्यनात्यनागु खँ कनादिल । एकल साँझया झ्वलय् कलाकार रघुवंशीं चर्या प्याखं, भरतनाट्यम, कत्थक, साल्सा, झ्याउरे प्याखं नं क्यनी ।
चर्या प्याखनय् वय्कलं पंचकपाल प्याखं क्यनेगु जानकारी बिउगु खः । चर्याया पंचकपाल नं आःतक सुनां नं मक्यंनिगु प्याखं जूगु दावी नं पत्रकार सम्मेलन याःगु खः । थ्व प्याखं भाजु शर्मां हे स्यना वयाच्वंगु दु ।
एकल नृत्यय् साल्सा प्याखनय् बाहेक फुक्क प्याखनय् वाद्यवादकपिंसं प्रत्यक्ष हे बाजं थाइगु खँ संघ यल शाखया नायः व एकल नृत्य न्ह्यब्वयादीत्यंम्ह रघुवंशीं कनादिल । वय्कलं थःत झिंन्याम्हं मल्याक बाद्यवादकपिंसं साथ बीगु खँ कनादिसें थःम्हं हुलेगु प्याखंया बारे जानकारी बियादीगु खः ।
२७ दँया कलाकार रघुवंशी भारतया अलाहबादं कत्थक नृत्यया डिप्लोमाय् स्वर्ण पदक त्याकेधुंकूम्ह खः । वय्कः मचां निसें हे कात्ति प्याखनय् प्याखं हुला वयाच्वनादीम्ह खः । एकल साँझ नृत्य निर्देशक संघ यल शाखाया ग्वसाः व साँस्कृतिक संस्थानया सह आयोजनाय् असार ३ गते जुइत्यंगु खः ।
LEAVE YOUR COMMENTS