‘५८ सय नं मलेसिया वनेफइमखु’

सरकारं क्वःछिउगु भावं जिमिगु ज्याकू तकं चले जुइमखु– म्यानपावर कम्पनी

येँ (नेपालभाषा टाइम्स)÷ नेपाः व मलेसिया दथुइ सोमवाः जूगु श्रम समझदारीइ हस्ताक्षर लिपा मलेसियाय् वैदेशिक रोजगारी वनीपिं नेपाःमितय्सं मुक्कं न्याद्वः व च्यासः (५८ सय) तका जक पूसां गाइ धाःसां उलि ध्यबां वनेमफइगु खँ धाःगु दु । सम्झौताय् रोजगारीया निंतिं वनेबलय् यायेमाःगु आर्थिक खर्च फुक्कं रोजगारी कम्पनीं हे बेहोरे यायेमाःगु खँ न्ह्यथनातःगुलिं आः ५८ सय तकाः मलेसिया वनेखनीगु खँ पिहां वःगु खः ।

नेपाल सरकारं रोजगारी वनीपिं नेपाःमिं सेवा शुल्क कथं म्यानपावर कम्पनीयात ५८ सय तका जक पूसां गाः धाःगु खः । तर म्यानपावर कम्पनीतय्सं उलि ध्यबां रोजगारीया निंतिं छ्वयेमइगु खँ धाःगु दु । छम्हेसिया ५८ सय तका जक कायेगु खःसा थःपिनि अफिस खर्च तकं उठे मजुइगु खँ म्यानपावर व्यवसायीतय्सं धाःगु दु ।
व्यवसायीतय् कथं मलेसियाय् रोजगारीया निंतिं वनीपिंसं म्होतिं नं ५० हजार तका पुलेमालीगु खँ धयाच्वंगु दु ।

छम्ह व्यवसायीं धाःगु दु ‘जिमिगु अफिस खर्च हे मवइगु जूसा थ्व व्यवसाय यानाच्वने हे छाय् । ज्याकुथिइ तालं ग्वया वंसां जिल नि । रोजगारीइ वनीपिं मनू मालेत एजेन्ट तयेमाः, उमित नं छुं भचा खर्च बी हे माल, ज्याकूया बाः, स्टाफ खर्च आदि यायेबलय् म्होति नं छम्ह रोजगारीइ वनीम्हेसिके ५० हजार तका मकासें गाइमखु ।’
मलेसियां नेपालय् रोजगारीया माग हइपिं एजेन्टयात ध्यबा नकेमाःगुलिं यानाः नं अप्वः खर्च तुइगु खँ उम्ह व्यवसायीं धाःगु दु ।

रोजगार हइपिं एजेन्टयात ध्यबा मबिइकं नेपालय् माग छ्वया हइमखु । अथे जूगुलिं एजेन्टयात ध्यबा नकेत व्यवसायीत बाध्य जुयाच्वंगु दु ।‘रोजगार बीगु कम्पनीं तप्यंक नेपाःया म्यानपावरयात मनू माल धकाः धाःवइ मखु, उमिसं अनया एजेन्टयात मनू माल धकाः धाइ, एजेन्टं नेपालय् माग छ्वयाहइ । उकिं सरकारं क्वःछिउगु भावं मनू छ्वयेगु सम्भव मदु’ उम्ह व्यवसायीं धाःगु दु ।

तर श्रम सम्झौतां रोजगारीइ वनीपिंत आपालं फाइदा जूगु धासें न्हापां थें मलेसियाय् वनेत धाःसा आः लाखौं तका खर्च यायेमाःगु अवस्था धाःसा मदुगु खँ म्यानपावर व्यवसायीतय्सं धाःगु दु । व्यवसायीतय् कथं न्हापां स्वयां खर्च म्हो जुइ, उकिं रोजगारीइ वनीपिं ५० हजार पुलेत नं तयार जुइगु खँ धाःगु दु ।

रेमिट्यान्स दुहां वइगु अप्वल

चालू आर्थिक दँया लिपांगु निगू महिनाय् रेमिट्यान्स ३४.४ प्रतिशतं अप्वः दुहां वःगु दु । विश्व बजारय् डलर बल्लाःगुलिं यानाः नेपालय् रेमिट्यान्स दुहां वइगु अप्वःगु खँ राष्ट्र बैंकं धाःगु दु । राष्ट्र बैंकया कथं वंगु भदौ तक १ खर्ब ५४ अर्ब २० करोड तका रेमिट्यान्स दुहां वःगु दु । न्हापा उगु हे ईया दुने ०.७ प्रतिशतं जक रेमिट्यान्स अप्वःगु खः । राष्ट्र बैंकया कथं लिपांगु श्रम स्वीकृतिया आधारय् वैदेशिक रोजगारीइ वनिपिं नेपाःया ल्याः धाःसा म्हो जूगु दु ।