कोरोना इलय् जाँच दिकेत विद्यार्थीया प्रदर्शन

येँ – कोरोना महामारी अप्वया वनाच्वंगु इलय् नं जाँच कायेगु धकाः त्रिविविं पिकाःगु सुचंया विरोध यासें बागबजाःया पद्मकन्या क्याम्पस पिने विद्यार्थीतय्सं प्रदर्शन याःगु दु । जाँचय् यक्व भीडभाड जुइगु जुयाः त्रिविविं काये धाःगु जाँच स्थगित यायेमाः, कि मखुसा जाँच बीपिं विद्यार्थी फुकसित खोप लगे यायेमाः धइगु माग यासें अन प्रदर्शन याःगु खः ।

पद्मकन्याय् १८ गू क्याम्पसया सेन्टर लानाच्वंगु दु । त्रिविविं भदौ ५ गते तक तोके यानातःगु छुं नं परीक्षा स्थगित यायेगु मखु धकाः सुचं पिकायेधुंकूगु दु ।

विद्यार्थीतय्सं अन ‘नो भ्याक्सिन, नो एक्जाम’ धइगु नारा थ्वयेकाः प्रदर्शन याःगु खः । प्रदर्शनय् प्रहरीं हस्तक्षेप यानाः खुम्ह विद्यार्थीयात ज्वना यंकूगु दु ।

मेखे थ्वहे साउन ३२ गतेनिसें सञ्चालन जुइत्यंगु जाँचय् सहभागी जुइमाःपिं १० म्ह विद्यार्थीयाके कोरोना पोजिटिभ खने दयेवं उमित वैकल्पिक ढंगं जाँच कायेगु व्यवस्था यायेमाः धइगु माग यासें हेटौंडाया छथ्वः विद्यार्थीत त्रिविविइ वःगु दु ।

अनया वन तथा विज्ञान अध्ययन संस्थानपाखें बीएससी फेरस्ट्री न्हापांगु सेमेष्टरया जाँच बीगु तयारी यानाच्वंपिं १० म्ह विद्यार्थीयाके कोरोना पोजिटिभ खने दुगु खः ।
येँय् वार्ता याः वःपिं थ्व विद्यार्थीतय्त त्रिविविपाखें जाँच पूवंक रोके यायेमाः धइगु पक्षय् यक्वं विद्यार्थीत मदुगु जुयाः जाँच दिकेगु सम्भव मदुगु जानकारी याःगु खः । यदि जाँच दिकेमाःगु खःसा उकिया लागिं सम्बन्धित क्याम्पसपाखें हे सिफा–रिस वयेमाःगु खँ नं त्रिविविं धाःगु खः । विद्यार्थीतय्सं धाःसा जाँच स्थगन मधाःसा तालाबन्दीया ख्याच्वः बिउगु दु ।