आः जिल्लाय् खुगू जक सरकारी ज्याकू

येँ – देशय् संघीयता कार्यान्वयनय् वये धुंकाः जिल्लागत रुपं दइगु सरकारी ज्याकू खुगू जक दइगु जूगु दु । देशय् स्वंगू तहया सरकार निर्माणलिसें संघीयता कार्यान्वयनय् वयेधुंकाः केन्द्रीयस्तरय् दुगु मन्त्रालयनिसें सरकारी निकाय क्वपालेगु झ्वलय् आः जिल्ला तहय् दइगु सरकारी ज्याकू नं म्हो जुइत्यंगु खः ।

संघीय मामिला तथा सामान्य प्रशासन मन्त्रालयया प्रवक्ता सुरेश अधिकारीं बियादीगु जानकारी कथं संविधानकथं संघपाखें संचालन जुयाच्वंगु खुगू जक ज्याकू आः जिल्ला तहय् दइगु जूगु दु । वय्कःया कथं जिल्ला प्रशासन, कोष तथा लेखा नियन्त्रण, जिल्ला निर्वाचन, जिल्ला हुलाक, जिल्ला अदालत व जिल्ला प्रहरी ज्याकू जक जिल्ला तहय् दइगु जूगु दु ।

थ्व स्वयां न्ह्यः जिल्ला तहय् दुगु ज्याकूत अप्वःथें स्थानीय तहया अधिकार क्षेत्र दुने लाःगुलिं अज्याःगु ज्याकू दक्वं आः स्थानीय सरकार अन्तर्गत हे निहीत जुइगु जूगु दु । जिल्ला तहय् दइगु खुगू ज्याकू बाहेकं मेगु दक्वं ज्याकू स्थानीय तह अन्तर्गत मन्त्रालयं निर्देशन तकं बीधुंकूगु दु । थ्व हे झ्वलय् आः तत्कालया निंतिं जिल्ला मालपोत व जिल्ला नापी ज्याकूयात स्थानीय तहया अधिकार क्षेत्र दुने यंकूगु जुयाच्वंगु दु ।