अमेरिकां ५० करोड डोज खोप अनुदान बिइगु

एजेन्सी- अमेरिकां विकासशील व आम्दानी बमलाःपिं देय्तय्त ५० करोड डोज खोप अनुदान बिइगु घोषणा याःगु दु । संयुक्त राष्ट्रसंघया महासभाय् अमेरिकाया राष्ट्रपति जो बाइडेनं ५० करोड डोज फाइजर खोप आकिवं निसें इनेगु शुरु यायेगु धाःगु दु । राष्ट्रपति जो बाइडेनं विश्वया सछिगू देय्यात खोप अनुदान बिइगु नं धाःगु दु ।

राष्ट्रपति बाइडेनं संयुक्त राष्ट्रसंघया महासभाय् सम्बोधन यासें विश्वं कोरोनाया अन्त्य जुइमाःगु व कोरोना अन्त्यया निंतिं मेगु दँया सेप्टेम्बरया दुने विश्वया ७० प्रतिशत नागरिकयाथाय् खोप थ्यनेमाः धाःगु दु । राष्ट्रपति बाइडेनं खोप थ्यकेत सकसित ग्वाहालि यायेत नं इनाप याःगु दु ।

राष्ट्रपति बाइडेनं थ्व लक्ष्य महत्वाकांक्षी खःसां तसकं महत्वपूर्ण जूगु धाःगु दु । अमेरिकाया छगू अर्ब व १० करोड डोज खोप अनुदानय् वितरण यायेगु योजना दुसा १६ करोड डोज वितरण यायेधुंकूगु दु ।
राष्ट्रपति बाइडेनं धाःथें विश्वया ७० प्रतिशत नागरिकतय्त खोप बिइत ११ अर्ब डोज खोप माः । आःतक विश्वन्यंकं खुगू करोड डोज खोप जक वितरण जूगु दु ।

विश्व स्वास्थ्य संगठनया अध्ययनकथं आतक तःमिगु देय्तय्सं सालाखाला ८० प्रतिशत खोप काःगु दुसा चिमिगु देय्तय्सं सालाखाला २० प्रतिशत जक खोप काःगु दु । विश्व स्वास्थ्य संगठनया आज्जुकथं विश्वया हरेक देसं सन् २०२१या अन्त तकया दुने ४० प्रतिशत मनूतय्त खोप थ्यंकेमाःगु दुसा अथे यायेगु सम्भावना तसकं हे म्हो जक दु ।