ने. सं. ११४४ कौलाथ्व षष्ठी -

मन्त्रिपरिषद् विस्तारया तयारी

येँ – माओवादी केन्द्रया अध्यक्ष पुष्पकमल दाहालं थौं मन्त्रिपरिषद विस्तार जुइगु जानकारी बियादीगु दु । वय्कलं म्हिगः पार्टीया स्थायी कमिटीया बैठकय् उगु जानकारी बियादीगु खः । उकथं हे पार्टीया प्रवक्ता कृष्णबहादुर महरां नं थौं मन्त्रिपरिषद् विस्तार जुइगु जानकारी बियादीगु दु । म्हिगः स्थायी कमिटीया बैठक लिपा सञ्चारकर्मीत लिसे खँ ल्हासें महरां उगु जानकारी बियादीगु खः ।

स्थायी कमिटीया बैठकय् दाहालं न्ववाःगु खँ धासें महरां धयादिल, ‘स्थायी कमिटीइ सरकारया बारे सहलह जुल, अध्यादेशया कारणं भचा लिबाःगु खः, ज्या क्वचाल, थौं वा कन्हय् तक सरकार विस्तारया ज्या क्वचाइ ।’ राजनीतिक दल सम्बन्धी अध्यादेश प्रतिनिधिसभाय् दुगुलिं सरकार विस्तार यायेत समस्या जुयाच्वंगु खः । विशेष यानाः जनता समाजवादी पार्र्टीं अध्यादेश लित मकायेकं सरकारय् मवनेगु अडान कया वयाच्वंगु खः । अध्यक्ष यादवया पार्टीइ मन्त्री जुइपिं आकांक्षी अप्वः दयेवं

वय्कलं विधेयक लित मकायेकं सरकारय् मवनेगु खँ धायेगु यानाहःगु खः । अध्यक्ष यादवया पुचलय् थौंकन्हय् झिंच्याम्ह सांसद दु । यदि छुं गथे जुयाः तत्काल सरकारय् वन धाःसा असन्तुष्ट पुचलं पार्टी तछ्याये फइगु भयया कारणं वय्कलं अध्यादेश लित कायेमाःगु अडान कयाच्वंगु खः ।
मेख नेकपा एकीकृत समाजवादी पार्टीया अध्यक्ष माधव नेपालं धाःसा तत्काल अध्यादेश लित काये मजिउगु सुझाव प्रधानमन्त्री देउवायात बिया वयाच्वंगु दु । नेपालं थःगु पार्टी विरुद्ध लानाच्वंगु मुद्दा अदालतय् विचाराधीन जुयाच्वंगुलिं अध्यादेश लित कायेवं थःगु पार्टीया औचित्ययात कयाः न्ह्यसःचिं ब्वलनेफु धासें तत्काल अध्यादेश लित काये मजिउ धायेगु यानाच्वंगु खः ।

सरकारं प्रतिस्थापन विधेयक हयाः अध्यादेश खारेज यायेगु तयारी यानाच्वंगु खँ सीदुगु दु । यदि गठबन्धन दल दथुइ सहमति कायम जुल धाःसा थौं हे प्रतिस्थापन विधेयक हयाः अध्यादेश खारेज याये फइगु खँ धाःगु दु । मन्त्रि–परिषद् विस्तार याये मफयेवं प्रतिपक्षी पार्टी एमालेया अध्यक्ष केपी ओलीं थीथी थासय् प्रधानमन्त्री शेरबहादुर देउवायात व्यंग्य यासें मन्त्रिपरिषद् छगू दयेके मफुम्हेस्यां देश छु दयेका नइ धायेगु याना हयाच्वंगु दु ।

‘चुनाव तक हे गठबन्धन न्ह्याइ’
नेकपा एकीकृत समाजवादी पार्टीया अध्यक्ष माधव नेपालं वर्तमान सत्ता गठबन्धनयात चुनाव लिपा नं निरन्तरता बीगु थःगु सोच दुगु खँ धयादीगु दु । मदुम्ह वामपन्थी नेता सहाना प्रधानया लुमन्तिइ ग्वसाः ग्वःगु भर्चुअल ज्याझ्वःयात सम्बोधन यासें नेपालं वइगु चुनावय् नं वाम–लोकतान्त्रिक गठबन्धनयात न्ह्यःने न्ह्याकेगु सोच दुगु खँ धयादीगु खः ।

सम्बोधनया झ्वलय् अध्यक्ष नेपालं धयादिल, ‘न्यागू दल जानाः वाम–लोकतान्त्रिक गठबन्धन दयेकूगु दु, थ्व सरकार वइगु चुनाव तक सहकार्य यानाः न्ह्यःने न्ह्याःवनी, व स्वयां न्ह्यःने न्ह्याका यंकेगु जिमिगु सोच दु ।’ नेता नेपालं आः याकनं हे प्रदेश नम्बर १ व बागमति प्रदेशय् थःपिनिगु नेतृत्वय् सरकार गठन यायेगु तयारी जुयाच्वंगु खँ नं धयादीगु दु ।