विभाग दु, जनशक्ति व साधन मदु

यातायातया थीथी साधन मध्ये नेपालय् दकलय् अप्वः थौंकन्हय् चर्चा जुयाच्वंगु धइगु रेल खः । सार्वजनिक यातायातय् रेलया चर्चा मेमेगु सवारी साधनं स्वयां भचा अप्वः हे जुयाच्वंगु दु । रेल विभाग नं गठन यानातःगु दु, तर विभागयया निंतिं आवश्यक मात्राय् जनशक्ति मदुगु जक मखु, रेलया इन्जिनियरतकं मदु । थ्व हे कारणं यानाः दछि न्ह्यः हे सम्पन्न जुइमाःगु बथना–जोगवनी–बुधनगर जुयाः विराटनगर वइगु १८ दशमलव ५ किमि र जनकपुर–जयनगर–बिजुलपुरा–बर्दिवास ६९ किलोमीटरय् १,६७६ मिलिमीटर चौडाइया ब्रोडगेज रेलमार्ग नं अलपत्रय् लानाच्वंगु दु ।

रेलमार्ग निर्माणया निंतिं आवश्यक जनशक्ति मदुगु व नाकाबन्दी अले वयां लिपाया खुद्रा समस्याया कारणं क्वःछिनातःगु इलय् ज्या क्वचायेके मफुगु विभागया प्रवक्ता प्रकाशभक्त उपाध्यायं कनादिल । ‘विभागय् महानिर्देशकनापं प्यम्ह सिभिल इन्जिनियर दु, रेल इन्जिनियर मदु, प्राविधिक जनशक्तिया कमी जूगुलिं हे ज्याय् ढिलासुस्ती जूगु दु, नाकाबन्दीं जनकपुर–जयनगर रेलया ज्या झिंन्याला लिबाःगु दु, थगुने पुस मसान्तय् क्वचायेकेगु लक्ष्य नं पूरा जुइमफुत, वि.सं. २०७५ पुसय् क्वचायेगु लक्ष्य कयातःगु दु’ वय्कलं धयादिल ।

भौतिक पूर्वाधार मन्त्री वीरबहादुर बलायरं छुं दिं न्ह्यः जूगु छगू सार्वजनिक ज्याझ्वलय् रेल इन्जिनियर व प्राविधिक जनशक्तिया अभावय् रेलमार्गया ज्या क्वःछिनातःगु इलय् पूवंके मफुगु खँ धयादीगु खः । वि.सं. १९९४ (सन् १९३७) य् शुरु जूगु जनकपुर–जयनगर–बिजुलपुरा ५१ किलोमीटर रेलमार्ग वि.सं. २०५८ या खुसिबालं बिगी ताँ चुइकेवं जनकपुर–जयनगर २९ किलोमीटरय् सीमित जूगु खः । थ्व रेलमार्ग नं स्तरोन्नति यायेत धकाः विभागं वि.सं. २०७० लय् बन्द याःगु खः । विराटनगरया रेलमार्ग निर्माणय् धाःसा मुआब्जा चित्त बुझे मजुयाः अदालतय् मुद्दा लानाः ज्या दिनाच्वंगु विभागं न्ह्यथंगु दु । जिल्ला अदालत व उच्च अदालतं मुद्दाय् बुइ धुंकाः आः उगु मुद्दा सर्वोच्चय् थ्यंगु दु ।

थुपिं निगुलिं रेलमार्ग भारत सरकारया अनुदान ग्वाहालिइ निर्माण जुयाच्वंगु दु । रेलमार्गया विकास यायेगु उद्देश्यं वि.सं. २०६८ असार १ गते विभागया स्थापना जूगु खः । वि.सं. २०६६ लय् नेपालय् विद्युतीय रेलमार्गया सम्भाव्यता अध्ययन यायेगु निंतिं विद्युतीय रेलवे आयोजनाया स्थापना याःगु खः । आयोजनां स्वनिगलय् मेट्रो रेल, मेचीकाली विद्युतीय रेलमार्ग लगायत रेलमार्गया विषयय् कोरियाली कम्पनीपाखें सम्भाव्यता अध्ययन याकूगु खः ।
सम्भाव्यता अध्ययन जुयाः अलपत्र अवस्थाय् लानाच्वंगु विद्युतीय मेट्रो रेलया ज्या न्ह्याः मवंसां प्रधानमन्त्री लिसें सरकारया मन्त्री व नेतातय्सं धाःसा इलय्व्यलय् भाषणय् रेल वये हे त्यंगु थेंज्याःगु अभिव्यक्ति धाःसा बिया वयाच्वंगु दु । थुकिं जनताय् धाथें रेल वये हे त्यंगु थें जूसां वास्तविकाता धाःसा अथे मखु ।

# स्वनिगलय् सम्भाव्यता अध्ययन जक

रेल विभागं प्यदँ न्ह्यः कोरियन कम्पनीयात स्वनिगलय् मेट्रो रेलया विषयय् सम्भाव्यता अध्ययन याकूगु खः । ज्या शुरु जूगुया दुने म्होतिं नं २० दँया दुने रेल वइगु सम्भावना मदुगु विभागया महानिर्देशक अनन्त आचार्यं धयादी ।स्वनिगलय् ७७ किमी रेलमार्ग दयेकेगु अध्ययन जूगुलिइ २५ किमी भूमिगत व ५२ किमी आकाशे रेलमार्ग दयेकेमाःगु जुइ । न्यागू भागय् विभाजन यानाः स्वंगू भाग आकाशे व निगू भाग भूमिगत मार्ग निर्माणया निंतिं अध्ययन कार्यदलं सिफारिस याःगु विभागं न्ह्यथंगु दु ।

सातदोबाटो–रत्नपार्क–नारायणगोपालचोक १२ किमी, किपू–कालिमाति–न्हू बानेश्वर–एअरपोर्ट ११ किमी व कोटेश्वर–चाबही–स्वयम्भू २९ किमीइ आकाशे रेलमार्ग दयेकेत सिफारिस यानातःगु दु । स्वयम्भू–डिल्लबजार–बौद्ध १२ किमी व धोवीघाट–सिंहदरवार–नंसाः–ग्वंगःबुँ १४ किमीइ भूमिगत रेलमार्ग निर्माणया सिफारिस यानातःगु दु । स्वनिगलय् न्यागः विद्युतीय रेलमार्ग निर्माणया निंतिं कुल ५४,७१७ करोड लगे जुइगु अध्ययन प्रतिवेदनं क्यंगु विभागया धापू दु ।

# मेचीमहाकाली रेलमार्गं गति काये मफु

सरकारं राष्ट्रिय गौरवया आयोजनाया रुपय् घोषणा याःगु मेचीमहाकाली रेलमार्ग नं गति काये फयाच्वंगु मदु । मेचीकाली विद्युतीय रेलमार्ग ९४५ किलोमीटर ताःहाकः दु । थ्व रेलमार्गय् आतक २५ किमी जक ज्या शुरु जूगु दु । २५ किमीइ नं ८५ प्रतिशत ज्या सिधये धुंकूगु विभागया प्रवक्ता उपाध्यायं कनादिल । यातायातयात सहज व सुलभ दयेकेत रेलमार्गया आवश्यक जूसां नं सम्बन्धित निकायया बेवास्तां समस्या जुयाच्वंगु रेल विभागया अधिकारीतय् धापू दु ।