ने. सं. ११४६ बछलाथ्व पञ्चमी - दयावीरसिं बुदिं

धलय् कुतुं वनाः मचा बेपत्ता

येँ – येँया कपनय् धलय् कुतुं वंम्ह छम्ह मचायात अझं लुइके फुगु मदुनि । वंगु मंगलवाः बुढानिलकण्ठ नगरपालिका वडा नम्बर १० व ६ या सिमानाय् च्वंगु मिलनचोक तरकारी बजारय् च्वंगु धलय् मचा कुतुं वंगु खः । बेपत्ता जूम्ह मचाया म्हसीका धाःसा खुले जूगु मदुनि ।

स्थानीयतय्सं मचा कुतुं वंगु खनेवं प्रहरीयात खबर याःगु खःसा बुधवाः सनिलय् तकं उम्ह मचा लुइके मफुनिगु खँ प्रहरीं धाःगु दु । प्रहरी प्रभागय् आः तक निम्ह मचा तंगु विवरण वःगु खँ प्रहरीं धाःगु दु । उपिं मध्ये गुम्ह मचा धलय् कुतुं वंगु धयागु खँ सीके मफुनि । मचा मालेगु निंतिं सामाखुसिं प्रहरी निरीक्षकया कमाण्डय् झिंस्वम्ह विपद् व्यवस्थापनया पुचः खटे जूगु खःसा उगु पुचलं धः जःखः मालेगु ज्या याःगु खः ।