सरिता गिरियात सांसद पदं चिइकल

येँ – जनता समाजवादी पार्टीया नेतृ सरिता गिरियात सांसद पदं चिइकूगु दु । थौं न्हिनय् संघीय संसदया सभामुख अग्निप्रसाद सापकोटां सांसद गिरियात सांसद पदं चिइकागु घोषणा यानादीगु खः । सभामुख सापकोटां गिरियात चिइकेगु पतिइ सही यानाः थौं संसद सचिवालयय् उकिया सुचं तिकेधुंकूगु खँ जसपाया नेता राजेन्द्र श्रेष्ठं कनादीगु दु ।

जनता समाजवादी पार्टीं गिरियात पार्टी निष्काशन यायेधुंकाः सांसदं चीकेत निवेदन बीवं सभामुखं गिरियात चिइकूगु खः । आः गिरिया थास् लिला सिटौला सांसद जुइगु खँ जसपाया नेता श्रेष्ठं कनादीगु दु । गिरि तत्कालिन समाजवादी पार्टीं समानुपातिकपाखें खस आर्य कोटां सांसद दयेकातःगु खः । आः गिरियात चिइकेवं समानुपातिक धलखय् वय्कःया क्वय् नां दुथ्याकातःम्ह सिटौला सांसद जुइत्यंगु खः ।

कालापानिया लिम्पियाधुरा व लिपुलेक दुथ्याकाः नेपाःया न्हूगु नक्सा दयेधुंकाः निशान छाप हिलेत सरकारं हःगु विधेयकय् गिरिं विरोध यानाः संशोधन तःगु खः । राष्ट्रियताया निंतिं सत्तारुढ, प्रतिपक्ष फुक्क पार्टी छप्पँ जुयाच्वंगु इलय् जसपां नं विधेयकया पक्षय् मत बीत ह्वीप जारी याःगु खःसा गिरिं धाःसा पार्टीया ह्विप तकं माने मयाःगु खः । लिसें वय्कःयात संशोधन लित कायेत धालं नं संशोधन लित मकाःगु खः । थ्व हे कारणं वय्कःयात म्हीग जसपां पार्टीं निष्काशन यानागु घोषणा याःगु खः ।