संखुवासभाय् म्हिगः दोहोर फायरिङ

येँ – संखुवासभाया जंगल लागाय् विप्लव पक्षया छापामार व सुरक्षाकर्मी दथुइ गोली हानाहान जूगु समाचार न्हिछि हे चर्चाय् वयाच्वंसां उगु घटनाय् लानाः छु गुलि क्षति जुल धइगु खँया बारे छुं विवरण वःगु मदुनि । सुरक्षा निकायया श्रोतं धाः कथं प्रदेश १ अन्तर्गत संखुवासभा जिल्लाया सिलिचोङ गाउँपालिका–१ स्थित ह्वाङ्ला धाःगु थासय् म्हिगः सुथय् ९ बजे उगु घटना जूगु खः । नेपाल प्रहरी व सशस्त्र प्रहरीया १९ म्ह दुगु छगू पुचःयात गस्तीइ वनाच्वंगु इलय् विप्लवया छापामारतय्सं गोलीं कयेकेवं अन दोहोरो फायरिङ जूगु खँ संखुवासभाया सीडीओ जीवनप्रसाद दुवालं कनादीगु दु । तर वय्कःयाके थ्वयां अप्वः जानकारी धाःसा मदु ।

लिपा न्हिनय्पाखे येँनं वंगु नेपाली सेनाया एमआई–१७ हेलिकप्टरपाखें सेनाया १५ म्ह व प्रहरीया १० म्ह सुरक्षाकर्मीयात घटनास्थलय् क्वकायेगु ज्या यात । अथे हे विराटनगरं वंगु मेगु हेलिकप्टरं नं छुं सुरक्षाकर्मीयात घटनास्थलय् क्वकाल । म्हिगः न्हिछिया दुने करिब ५० म्ह सुरक्षाकर्मीयात ह्वाङ्लाय् क्वकाःगु खः ।

वयां लिपा स्वंगः हेलिकप्टरं घटनास्थलया च्वय् सर्गतय् हवाई गस्ती याःगु खः । हेलिकप्टरं वरुण राष्ट्रिय निकुञ्जया च्वय् ब्वयेकाः विप्लवया छापामारत मालेगु ज्या याःगु खः । विप्लवया छापामार पुचलय् करिब २५ म्ह ति लडाकू दयेमाः धकाः नं अनुमान याःगु दु । उमिगु अवस्था छु दु व उपिं गुखे स्वयाः बिसिउँ वन धइगु खँ धाःसा सी मदुनि ।
प्रदेश १ या प्रहरी प्रमुख ठाकुर ज्ञवालीं धाःसा अन निगू पक्षया दथुइ दोहोरो फायरिङ जूगु खःसां तापाक–तापाक च्वनाः गोली हानाहान जूगु खँ कनादीगु दु । तापाक च्वनाः गोलीं कयेकूगु जुयाः निगुलिं पक्षय् छुं नोक्सानी मजूगु अनुमान नं वय्कलं यानादीगु दु । थप सुरक्षाया लागिं वंगु सुरक्षाकर्मीया पुचः म्हिगः उखेपाखे हे च्वंगु खँ धाःगु दु ।