मदुम्ह समाजसेवी ताम्राकारया नामं अक्षय कोष नीस्वन

येँ (नेपालभाषा टाइम्स) – येँमपा १७ वडा पुलांम्ह वडासदस्य नापं लोकंह्वाःम्ह समाजसेवी प्रेमदास ताम्राकार मदुगु झिंस्वन्हुया पुण्य तिथिस म्हिगः येँमपा १७ वडाया ग्वसालय् १७वडाया ख्यलय् श्रद्धाञ्जली सभा जुल ।

मदुम्ह ताम्राकारप्रति श्रद्धाञ्जली देछाया जक मगाः उकिं वय्कःया नामं अक्षय कोष नं नीस्वने माः धासें उकिया निंतिं येँमपा १७ वडापाखें छगू लख तकाया अक्षय कोष नीस्वनागु घोषणा ज्याझ्वःया सभापतित्व यानादीम्ह येँमपा १७ वडाया अध्यक्ष नविन मानन्धरं यानादिल ।

गणेश साय्मिं न्ह्याकादीगु ज्याझ्वलय् मदुम्ह ताम्राकारया मां तुल्सीमाया ताम्राकार, काकीमां श्रीकुमारी ताम्राकार काय फिरोज ताम्राकार, वडासदस्यपिं जितेन्द्र खड्गी, बाबुराजा महर्जन, कमला महर्जन, थँहिति त्वाःपाखें केशव साय्मि, छत्रपाति त्वाःपाखें डा. मनोजमान श्रेष्ठ, धल्को त्वाःपाखें पुरुण शाक्य, श्याम मानन्धर, गोपाल माली, कुमारदेव मानन्धरपिंसं मदुम्हेसिया किपातय् स्वां देछासे मदुम्ह ताम्राकारया योगदान व वय्कःया व्यक्तित्व बारे थःथःपिनिगु नुगः खँ प्वंकादीगु खःसा १७ वडा ज्याकुया क्यबय् वय्कःया नामय् रुद्राक्ष माः पीगु ज्या नं जूगु खः ।