कम्युनिष्ट भोटं कांग्रेस उम्मेदवार त्यात

येँ (नेपालभाषा टाइम्स)- नेपाःया वकिलतय्गु संस्था नेपाल बार एशोसियसनया चुनावय् एमाले बाहेकया फुक्क कम्युनिष्ट पार्टीत मिले जुयाः कांग्रेसया उम्मेदवारयात त्याकूगु दु । नकतिनि क्वचाःगु बार एशोसियसनया म्हिगः पिहां वःगु लिच्वः कथं सत्ता गठबन्धनया मंकाः उम्मेदवार जुयादीम्ह वरिष्ठ अधिवक्ता गोपालकृष्ण घिमिरे अत्यधिक मत हयाः विजयी जुयादीगु खः । वय्कः कांग्रेस समर्थित कानून व्यवसायी खः ।

वय्कःया सत्ता गठबन्धनय् दुथ्याःपिं नेकपा (माओवादी केन्द्र), नेकपा (एस), राजमो लगायतया कम्युनिष्ट पार्टी समर्थित उम्मेदवारतय्सं नं मत बिउगु खः । घिमिरें कुहां वंगु कुल मत मध्ये ४,४७४ मत हःगु खःसा वय्कःया निकटम प्रतिद्वन्द्वी एमालेया उम्मेदवार बिष्णुमणि अधिकारीं २,४८२ मत हःगु खः । महासचिव पदय् गठबन्धनया हे उम्मेदवार अन्जिता खनाल विजयी जुयादीगु दु ।

चुनावय् सत्ता गठबन्धनया प्यानल हे विजयी जूगु खः । म्हिगः सार्वजनिक जूगु लिच्वः कथं उपाध्यक्ष पदय् प्रदेश १ पाखें अधिवक्ता सुरज खत्री, मधेश प्रदेशपाखें सुधीर कुमार कर्ण, बागमतीपाखें हर्कबहादुर रावल, गण्डकीपाखें वीरेन्द्र केसी, लुम्बिनीपाखें पशुपति भण्डारी, कर्णालीपाखें उत्तम प्रसाद आचार्य व सुदूर पश्चिमपाखें तुलाराम गिरि निर्वाचित जुयादीगु खः । मिसा उपाध्यक्षय् आशा राई त्याःगु दुसा कोषाध्यक्षय् भरत रावत त्याःगु दु ।

सत्ता गठबन्धनपाखें ल्वाःगु थ्व चुनावय् नेपाली कांग्रेसयात अत्यधिक फाइदा जूगु दु । थुकयिात गुलिखे मनूतय्सं सत्ता गठबन्धन छखे व एमाले याकःचा मेखे जुयाः चुनाव ल्वात धाःसा गज्याःगु लिच्वः वइ धकाः क्यंगु छगू नमूना खः धकाः नं विश्लेषण याना हःगु दु । आःया स्थानीय चुनावय् नं एमाले याकःचा छखे व सत्ता गठबन्धन मेखे जुयाः धेंधेंबल्लाः जुइत्यंगु दु ।

सम्बन्धित बुखँ

LEAVE YOUR COMMENTS