आन्दोलनया ज्याझ्वः लित कयागु मदु ः डा. श्रेष्ठ
आः स्वनिगःया थाय्बाय्या नां नेवाःकरण यायेगु अभियान
यल – सरकारं सहलहया निंतिं राष्ट्रियसभाय् दर्ता यानातःगु गुथि विधेयक सर्वसम्मतं लित काःसां थुकिया विरुद्ध न्ह्यानाच्वंगु आन्दोलन धाःसा जारी हे याना तइगु जूगु दु । वंगु मंगलवाः च्वंगु राष्ट्रियसभाया बैठकं गुथि विधेयक लित कायेगु सम्बन्धी प्रस्ताव सर्वसम्मतं पारित याःगु खः ।
भूमि व्यवस्था, सहकारी तथा गरिबी निवारण मन्त्री पद्माकुमारी अर्यालं विधेयक लित कायेत उगु प्रस्ताव तःगु खःसा उगु प्रस्ताव सर्वसम्मतिं पारित याःगु घोषणा राष्ट्रियसभाया अध्यक्ष गणेशप्रसाद तिमिल्सिनां यानादीगु खः । राष्ट्रियसभाय् दर्ता जुयाच्वंगु गुथि विधेयक वैधानिक रुपं हे लित कायेवं आः थुकिया विरुद्ध न्ह्यानाच्वंगु व पूर्ववत् घोषित आन्दोलनया थीथी ज्याझ्वःत नं लित काःगु खःला धइगु खँय् यक्वसिनं चिउताः प्वंका हयाच्वंगु दु ।
गुथि विधेयकलिसें आः आन्दोलनया ज्याझ्वः नं लित काःगु खःला वा आःयात स्थगित जूगु खःला धइगु न्ह्यसःया लिसलय् गुथि विधेयक प्रतिरोध संयुक्त कार्यक्रमया संयोजक डा. महेशमान श्रेष्ठं गुथि विधेयक लित काःगु लसकुस याये बह जू तर पूर्ववत् घोषित आन्दोलनया छुं नं ज्याझ्वः लित कयागु मदु धकाः ‘नेपालभाषा टाइम्स’ यात कनादिल ।
वय्कलं धयादिल, ‘जनताया मागकथं सरकारं गुथि विधेयक लित काःगु मखुसें जनतां गुगु आन्दोलनया ज्याझ्वःत न्ह्याका वयाच्वंगु खः, व हे आन्दोलनया दबाबया कारणं विधेयक लित काःगु खः ।’
गुथि विधेयक लित कायेधुंकाः आः छु जुइ धइगु न्ह्यसःया लिसलय् वय्कलं सरकारं आः गुथि विधेयक हयेत सम्बन्धित गुथिया गुथियार, आन्दोलनय् कुहां वयाच्वंगु संघर्ष समितिइ नेतृत्व यानाच्वंपिं, कानूनविद् व सरोकारवालालिसे व्यापक सहलह यानाः इमिगु हे मागकथं विधेयक हयेत दबावमूलक ज्याझ्वःयात याना वनेगु जुइ धयादिल ।
संयोजक डा. श्रेष्ठं वंगु सोमवाः गुथि विधेयक विरुद्ध आन्दोलन याना वयाच्वंगु थीथी आन्दोलनकारी पुचः, गुथियार व सरोकारवाला दथुइ च्वंगु मुँज्यां घोषणा याःगु ज्याझ्वःकथं हे आन्दोलनयात न्ह्यःने यंकेगु जुइ धासें थ्व हे वइगु असार १४ गते शनिवाः स्वनिगःन्यंकंया खबरदारी मोटरसाइकल ¥याली व वयां लिपा असार २० गते ऐक्यवद्धता सभा जुइगु नं वय्कलं कनादिल ।
वइगु असार १४ गते शनिवाः सुथसिया ११ ताः इलय् येँया न्हूसतकय् मुनाः एकीकृत रुपय् मोटरसाइकल ¥याली पिथनेगु व स्वनिगःया मुख्य मुख्य लागाय् चाःहिलेगु ज्याझ्वः दुगु नं जानकारी बियादिल । अथे हे असार २० गते महाद्यः–पार्वती दबुलिइ थीथी आदिवासी जनजातिया संगठनया प्रतिनिधित ब्वनाः ऐक्यवद्धता सभा नं घोषित ज्याझ्वःकथं हे याइगु जूगु दु ।
थ्व हे झ्वलय् आः स्वनिगःया थीथी नांयात खस्करण याना यंकाच्वंगुयात नं दिकेगु निंतिं अभियान न्ह्याकीगु जूगु दु । संयोजक डा. श्रेष्ठं स्वनिगःया पुलांगु ऐतिहासिक, सांस्कृतिक, परम्परागत नांया थासय् थौंकन्हय् खस्करण जुयाः नेवाःतय्सं अपनत्वबोध याये मफया वनाच्वंगु धासें अज्याःगु थाय्बाय्या नां पुलांगुकथं हे तयेगु जुइ धयादिल ।
स्थानीय त्वालय् च्वंपिं ज्याथजिथिपिं, सःसिउपिंके न्यनेकने यानाः नेवाः नांया ग्वरः तयेगु अभियान नं न्ह्याकेगु जुइ धासें थुकिया निंतिं थ्व हे दिं धकाः व सुयागु निर्देशन पियाच्वनेमाःगु आवश्यक मजू धासें सकसिनं थःथःगु थासय् थौंकन्हय् हे स्थानीय त्वाःबहाःया नां तया यंकेत वय्कलं अपिल यानादीगु दु ।
LEAVE YOUR COMMENTS