दाफा बाजं खलःयात हार्मोनियम
किपू- किपू नगरपालिकां नगर दुनेया परम्परागत दाफा बाजं खलःयात हार्मोनियम लःल्हाःगु दु । नगरपालिकां नगर दुनेया झिंखुगू दाफा बाजं खलःयात हार्मोनियम लःल्हाःगु खः ।
किपू नगरपालिकाया प्रमुख रमेश महर्जन, उपप्रमुख सरस्वति खड्का, प्रमुख प्रशासकीय अधिकृत कृष्णप्रसाद सापकोटा, १ वडाअध्यक्ष हर्ष महर्जन, २ वडाअध्यक्ष रमेशमान डंगोल,३ वडाअध्यक्ष राजेन्द्र महर्जन, १० वडाअध्यक्ष अमन महर्जनं दाफा बाजं खलःयात मंकाःकथं हार्मोनियम लःल्हानादीगु खः ।
नगर प्रमुख महर्जनया हे सभापतित्वय् जूगु ज्याझ्वलय् वय्कलं दाफा खलकं दाफा म्येँ हालेगु व राग काइगु इलय् सुर मिले याये फत धाःसा दाफा म्येँया स्तर अझ थहां वनीगु व उकिया निंतिं हार्मोनियम उपयुक्त साधन जूगुलिं दाफा खलःयात हार्मोनियम लःल्हानागु खः धयादिल । दाफा बाजनय् न्हू पुस्तायात आकर्षित यायेगु ल्याखं बाजं खलःयात हार्मोनियम लःल्हानागु व याकनं हे दाफा बाजं खलःयापिंत हार्मोनियम प्रशिक्षण नं बीगु योजना दुगु जानकारी बियादिल ।
हार्मोनियमया प्रशिक्षणं दाफा खलः कलाकारपिं नं व्यावसायिकतापाखे पलाः न्ह्याके फइगु विश्वास नं वय्कलं प्वंकादिल । ज्याझ्वलय् उपप्रमुख रिजाल, २ वडा अध्यक्षलिसें सम्पदा, संस्कृति व पर्यटन विभागया कजि डंगोलं नं नुगःखँ प्वंकादीगु खः ।
LEAVE YOUR COMMENTS