नेपाःया न्हूगु नक्सा अस्वीकार्य : भारत

येँ – भारतं नेपालं थौं जारी याःगु न्हूगु राजनीतिक तथा प्रशासनिक नक्सा स्वीकार यायेमफइगु खँ धाःगु दु । भारतं नेपालं जारी याःगु नक्साय् थःगु देय्या भूभाग दावी यानातःगु धासें उगु नक्सा ऐतिहासिक तथ्य व प्रामणय् आधारीत मदुगु दावी याःगु दु ।

नेपाःया सरकारं लिम्पियाधुरा, कालापानी व लिपुलेक क्षेत्रयात दुथ्याकाः न्हूगु नक्सा जारी यायेवं भारतीय विदेश मन्त्रालयं छगू विज्ञप्ति पिथना उकीया विरोध याःगु खः । भारतं नेपाःया ज्या एकपक्षीय जूगु धासें थुकीया समाधान द्वीपक्षीय कूटनीतिक संवाद मार्फत समाधन यायेगु समझदारी अःख जूगु खँ न्ह्यथंगु दु ।

विदेश मन्त्रालयया प्रवक्ता अनुराग श्रीवास्तवं जारी याःगु विज्ञप्तिइ नेपाःयात अनुचित दाबी मयायेत व भारया सार्वभौमसत्ता व भौगोलिक अखण्डताया सम्मान यायेत नं इनाप याःगु दु । नापं सीमा विवादया खँय् भारतया अडानबारे नेपाःयात जानकारी दुगु खँ नं विज्ञप्तिइ धयातःगु दु ।

अथेहे नेपाःया नेतृत्वं कूटनीतिक संवाद मार्फत सीमा विवाद समाधन यायेगु लकस निर्माण याइगु विश्वास भारतं याःगु खँ धाःगु दु ।

नेपालं बुधवाः न्हिनय् लिम्पियाधुरा, कालापानी व लिपुलेक क्षेत्र सहितया न्हूगु राजनीतिक व प्रशासनिक नक्सा सार्वजनिक याःगु खः ।