ज्वालामुखी विस्फोट लिपा टोङ्गालिसे स्वापू त्वाःदल

एजेन्सी- प्रशान्त महासागरय् शनिवाः छगू ज्वालामुखी विस्फोट जुइवं टोङ्गाय् पूवंक सञ्चार स्वापू त्वाःदःगु दु । अथेहे ज्यालामुखी विस्फोट जुयाः वःगु खरानीं राजधानी नुकु आलोफाया विमानस्थल त्वपुइवं थन राहात ज्वलं यंकेत नं समस्या जूगु दु ।

राजधानी नुकु आलोफां ६५ किलोमिटर तापाक उत्तरपाखे समुद्र तःलय् शनिवाः तःधंगु ज्वालामुखि विस्फोट जूगु खः । थ्व ज्वालामुखी विस्फोट जूबलय् अमेरिकाय् थ्यंक हे सः वःगु व थुकिं टोङ्गाय् थ्यंक छगू मिटर स्वयां च्वय् लबू दंगु खः ।

थ्व विस्फोटं प्रशान्त क्षेत्रया टापुयात स्वाइगु समुद्र तःलं यंकातःगु महत्वपूर्ण तारय् क्षति जूगुलिं टोङ्गा पूवंक सम्पर्कविहिन जूगु खः । फोन व इन्टरनेटया स्वापू मदुगुलिं थन गुलि क्षति जुल धयागु पूवंक विवरण वयेफुगु मदुनि । अथे खःसां अस्ट्रेलिया व न्यूजिल्यान्डं यानास्वःगु हवाइ अनुगमनं न्ह्यथनेबहःगु क्षति जूगु विवरण पितबिउगु दु । रेडक्रसं आः थन स्वच्छ लःया आपूर्ति मू प्राथमिकता जूगु खँ धाःगु दु । तर रेडक्रसं थःपिंसं न्हापा बिचाः यानाकथं तःधंगु क्षति जूगु खनेमदु धकाः नं धाःगु दु । रेडक्रसं थ्व विस्फोटं ८० हजारं मल्याक मनूत प्रभावित जूगु खँ धाःगु दु । टोङ्गाया जनसंख्या थ्यंमथ्यं छगूलाख दुसा थन च्वंगु १७० गू टापु ७ लाख वर्ग किलोमिटर क्षेत्रय् न्यनाच्वंगु दु ।

समुद्री सतहया चिजाःगु भूभागय्लाःगु निगू टापु फोनोइ व मान्गों वयाच्वंगु खबर बांलाः मजूगु खँ राष्ट्र संघं धाःगु दु । सर्गतय् कुँ त्याः त्याः पिहां वयाच्वंगुलिं ग्वाहालि बीगु संस्थातय् स्याटलाइट फोनं नं ज्या याना मच्वंगु खँ धाःगु दु ।

शनिवाः तःधंगु विस्फोट जुइ न्ह्यवनिसें ज्वालामुखी सक्रिय जुयाच्वंगु खः । टोङ्गाया मौसम विभागं छुं क्षेत्रय् सल्फर व एमोनियाया बास वयाच्वंगु जानकारी वःगु धासें ख्याच्वं नं बिउगु खः । विज्ञतय्सं धाःकथं हुङ्गा टोङ्गा, हुङ्गा हा’आपाइ ज्वालामुखी दशकौं लिपा उगु क्षेत्रय् विस्फोट जूगु छगू शक्तिशाली ज्वालामुखी खः । थ्व ज्वालामुखी विस्फोटया कारणं जापान व अमेरिका लिसें तःगू देशय् सुनामी वयेफुगु ख्याच्वः नं बिउगु खः ।