ने. सं. ११४४ चौलाथ्व दशमी -

तेक्वान्डो राष्ट्रिय खेलकूदय् दुमथ्याइगु सम्भावना

निगू संघया विवाद
येँ – च्याक्वःगु राष्ट्रिय खेलकूदय् तेक्वान्दो दुमथ्याःगु सम्भावना ब्वलना वःगु दु । राष्ट्रिय खेलकूदय् दुथ्याःगु ३५ गू कासा मध्ये नीगू कासाया जिल्ला छनोट सुरु जुइधुंकूगु अवस्थाय् आकाझाकां तेक्वान्डोया जिल्ला छनोट दिकेवं थ्व सम्भावना ब्वलंगु खः । राष्ट्रिय खेलकूद परिषदं हे तेक्वान्डोया जिल्ला छनोट पनाबिउगु खः ।

परिषदं जिल्ला खेलकूद विकास समितिया पौ हे छ्वयाः तेक्वान्डोया छनोट ज्या दिकेत निर्देशन बिउगु खः । ताःई न्ह्यवनिसें तेक्वान्डो संघय् खने दयाच्वंगु विवादया कारणं राखेपं कासामि छनोटय् नं समस्या दुगु धासें छनोट ज्या दिकेत निर्देशन बिउगु खः । थौंकन्हय् तेक्वान्डो कासाय् निगू संघ सक्रिय जुयाच्वंगु दु ।

निगू संघ दुगु कारणं कासामि छनोटय् ज्या मछिंउगु खँ राखेपं धाःगु दु । राखेपं निगू संघ मर्ज मजुइकं राष्ट्रिय खेलकूदय् तेक्वान्डोयात दुमथ्याकेगु खँ धाःगु दु ।राखेपया ११० औं बोर्ड बैठकं तेक्वान्डोया विवाद छवाः दुने समाधान यायेत इनाप यासें वंगु कात्तिक २७ गते हे निगुलिं संघयात पौ छ्वःगु खः ।

तर निगुलिं संघ दथुइ ब्वलनाच्वंगु विवाद मज्यनेवं राखेपं छनोट ज्या हे दिकाबिउगु खः ।थौंकन्हय् प्रकाश शम्शेर राणाया नेतृत्वय् नेपाल तेक्वान्डो संघ व शिव कोइरालाया नेतृत्वय् नेपाल तेक्वान्डो युनियन सक्रिय जुयाच्वंगु दु । राणाया संघयात विश्व तेक्वान्डो महासंघं सम्बन्धन बियातःगु दु ।

राखेपं आः समस्या समाधान मजूगुलिं निगुलिं संघयात विघटन हे यायेमालेफुगु खँ धयाच्वंगु दु । तेक्वान्डो नेपालय् लोकंह्वाःगु व अन्तर्राष्ट्रिय ख्यलय् नेपालं पदक त्याकेधुंकूगु कासा खः । नेपाःया तेक्वान्डों एसियन खेलकूदय् न्हापांखुसी रजत त्याकूगु दुसा दक्षिण एशियाली कासाय् दकलय् अप्वः स्वर्ण थ्व हे कासा पाखें त्याकातःगु दु ।

अथेहे नेपालं छनोट चरण पार यानाः ओलम्पिकय् म्हितेखंगु नं थ्व हे छगू जक कासा खः । च्याक्वःगु राष्ट्रिय खेलकूदया छनोट ज्या वंगु मंसिर १४ गते निसें सुरु जूगु खः । च्याक्वःगु राष्ट्रिय खेलकूद वइगु माघ २५ निसें फागुन १ गते तक बाँक, बर्दिया, दाङ, रुपन्देहीया थीथी थासय् जुइत्यंगु दु ।