विपक्षी एमालेपाखें सदनय् पंगः
येँ- सभामुख अग्निप्रसाद सापकोटां नेकपा एमाले तछ्यायेत भूमिका म्हितूगु द्वपं बिसें एमालें म्हिगः संसद अवरोध याःगु दुसा उकिया हे कारणं निक्वः तक संसद स्थगित यायेमाःगु अवस्था पिहां वःगु दु ।
म्हिगः संसद न्ह्याये सातकि सभामुखया भूमिकायात कयाः एमालें न्ह्यसःचिं थनेवं संसद १५ मिनेटया नितिं स्थगित जूगु खः । वयां लिपा एमालेया प्रमुख सचेतक व सचेतकलिसे सहलह यानाःलि सभामुखं संसद न्ह्याकूगु खः । तर अबलय् नं एमालें हानं विरोध यायेवं संसद आः वइगु २५ गते तकया निंतिं स्थगित याःगु दु ।
संसद च्वने स्वयां न्ह्यः एमाले संसदीय दलया बैठक च्वंगु खःसा उगु बैठकं नेकपा (एकीकृत समाजवादी)या झिंप्यम्ह सांसदयात सदनय् वल धाःसा सदन अवरुद्ध यायेगु निर्णय याःगु खः । संसदीय दलया नेता लिसें पुलांम्ह प्रधानमन्त्री केपी ओलीया नेतृत्वय् च्वंगु बैठकं संसद अवरुद्ध यायेगु निर्णय याःगु खः ।
म्हिगः संसद अवरोध यायेगु झ्वलय् एमालें थःपिंसं कारबाही यानापिं माधव नेपाल सहित झिंप्यम्ह सांसदयात इलय् हे सभामुखं पदमुक्त मयासे दल विभाजनय् सहयोगी भूमिका म्हितूगु द्वपं एमालें बिउगु खः । सभामुखं ई बीधुंकाः एमालेया प्रमुख सचेतक विशाल भट्टराईं न्ववायेगु झ्वलय् एमालें कारबाही याःपिं सांसदतय्त पदमुक्त मयाःगु धासें सभामुखयात न्ह्यसः थनादीगु खः । प्रमुख सचेतक भट्टराईं धयादिल, ‘पार्टी तज्यायेधुंकाः छुं हे यायेम्वाः धकाः निर्णय यानादिल, नेकपा एमालें कारबाही याःपिं सांसदत बचे यायेत व एमाले तछ्यायेत छाय् सारथिया भूमिका म्हितादिया ?’
लिसलय् सभामुख सापकोटां धयादिल, ‘प्रचलित कानुनया आधारय् थ्व निर्णय यानागु खः, थ्व विषय सम्मानित अदालतय् विचारा– धीन जुयाच्वंगु दु, लिसें संविधानय् अदालतय् विचाराधीन मुद्दाय् निगुलिं सदनय् सहलह यायेत बन्देज तयातःगु खँ जानकारी याकाच्वना ।’
सभामुखया लिसः क्वचायेवं एमालेया सांसदतय्सं वेल घेराउ यानाः सभामुखया व्यवहार मुर्दावाद, सभामुखया आसनय् च्वनाः पार्टी तछ्यायेगु षडयन्त्र याये दइ मखु धकाः नाराबाजी याःगु खः ।
उकथं हे एमालें राष्ट्रियसभाया बैठकय् नं प्रतिनिधिसभाया मुद्दा ल्ह्वनेवं राष्ट्रियसभाया बैठक नं स्थगित जूगु दु ।
एमालें संसद अवरुद्ध याइगु खँ सीदयेवं सत्तारुढ गठबन्धन दलया बैठक च्वंगु खः । सिंहदरवारय् च्वंगु बैठकय् सरकारया मंकाः धारणा दयेकाः न्ह्याः वनेगु निर्णय याःगु खः । बैठकय् प्रधानमन्त्री शेरबहादुर देउवा, नेकपा माओवादीया अध्यक्ष पुष्पकमल दाहाल, नेकपा एसया अध्यक्ष माधव नेपाल, जनता समाजवादी पार्टीया अध्यक्ष उपेन्द्र यादव व संघीय परिषदया अध्यक्ष डा. बाबुराम भट्टराईपिसं ब्वति काःगु खः ।
एमाले तछ्यायेगु ज्याय् भूमिका म्हितूगु धासें एमालें सभामुखयात पिने नं आलोचना यानाच्वंगु दु ।
LEAVE YOUR COMMENTS