रायमाझीया सांसद पद छु जुइ ?

येँ (नेपालभाषा टाइम्स)- प्रतिनिधि सभाया सभामुख देवराज घिमिरें नक्कली भुटानी शरणार्थी प्रकरणय् सांसद टोपबहादुर रायमाझीयात ज्वंगु जानकारी सदनयात बिउगु दु । प्रतिनिधिसभाया म्हिगःया बैठकय् सभामुख घिमिरें एमालेया सांसद रायमाझीयात ठगी तथा संगठित अपराध सम्बन्धी मुद्दाय् ज्वंगु जानकारी याकूगु खः ।

सभामुख घिमिरें प्रतिनिधिसभाय् जानकारी याकेगु झ्वलय् धयादीगु दु, ‘गजेन्द्र बुढाथोकी लिसें जाहेरी बिउपिं वादी नेपाल सरकार, प्रतिवादी केशव दुलाल समेत रायमाझीयात मिति २०८०÷०१÷३१ गते ८ः२५ ताःइलय् येँ जिल्ला, बुढानिलकण्ठ नगरपालिका–५ पाखें ज्वनाः जिल्ला प्रहरी परिसर टेकुइ हिरासतय् तयातःगु व्यहोरा नेपाःया संविधानया धारा १०३ या उपधारा ६ कथं जिल्ला प्रहरी परिसर टेकुया पौपाखे सुचं वःगुलिं संदनयात जानकारी याकाच्वना ।’

प्रतिनिधिसभा नियमावली, २०७९ या नियम २४८ सं सांसदयात ज्वन धाःसा संसदयात जानकारी याकेमाःगु व्यवस्था दु । थ्वहे झ्वलय् सांसद रायमाझीया पद धाःसा कायम हे जुयाच्वंगु दु ।

प्रतिनिधिसभा नियमावली २०७९ या नियम २४८ (३) कथं सांसदयात फौजदारी मुद्दाय् ज्वनाः पुर्पक्षया निंतिं कुनेत छ्वल धाःसा सांसद पद निलम्बन जुइ । रायमाझीयात अदालतं कुनाः अनुसन्धान यायेत आदेश मबिउतले सांसद पद ल्यनाच्वनी । यदि अदालतं धरौटी वा साधारण तारेखय् त्वःतल धाःसा सांसदया हैसियतं नियमित ज्या यायेत व सुविधा कायेगुलिइ पंगः जुइ मखु ।

प्रतिनिधिसभा नियमावली २०७५ य् सांसदयात ज्वनेवं हे निलम्बन जुइगु व्यवस्था दुगु खः । तर वंगु मंसिर ४ या निर्वाचन लिपा न्हूगु प्रतिनिधिसभा नीस्वने धुंकाः प्रतिनिधिसभा नियमावली २०७९ दयेकेगु झ्वलय् व्यवस्था हिलाः पुर्पक्षया निंतिं कुनेमाःगु जुल धाःसा जक सांसद पदं निलम्बन जुइगु व्यवस्था याःगु खः ।

थ्वहे झ्वलय् म्हिगः येँ जिल्ला अदालतं रायमाझीयात स्वन्हु तक कुनाः अनुसन्धान यायेत प्रहरीयात अनुमति बिउगु दु । न्यायाधीश केशवप्रसाद अधिकारीया एकल इजलासं उगु अनुमति बिउगु खः ।

जिल्ला अदालतया अनुमति लिपा म्हिगःनिसें हे प्रहरीं रायमाझीया बयान कायेगु ज्या नं न्ह्याकूगु दु । जिल्ला सरकारी वकिलया ज्याकूया उपन्यायाधिवक्ता लिसें जिल्ला प्रहरी परिसर येँया मुद्दा शाखाया डीएसपी निरञ्जन भट्ट सहितया पुचलं बयान कायेगु शुरु याःगु खः ।

भ्रष्टाचारया हदम्याद विरुद्ध प्रदर्शन
भ्रष्टाचारया हदम्याद न्यादँ तयेगु प्रस्ताव विरुद्ध नेपाल विद्यार्थी संघं प्रदर्शन याःगु दु । नेविसंघया पुलांम्ह अध्यक्ष रञ्जित कर्णया नेतृत्वय् सम्पत्ति हिनामिना बाहेकया भ्रष्टाचारय् न्यादँ तक हदम्याद लगे जुइगु विधेयकया विरोधय् म्हिगः न्हू बानेश्वरय् प्रदर्शन याःगु खः । उगु विधेयक संसदय् विचाराधीन जुयाच्वंगु दु । विरोध प्रदर्शनया झ्वलय् निषेधित क्षेत्रय् दुहां वनेत स्वयेवं प्रहरीं हस्तक्षेप याःगु खःसा छम्हेसित ज्वंगु दु ।