शंखधर प्रतिष्ठानं प्रमयात नाप लात
ख्वप(नेपालभाषा टाइम्स)- राष्ट्रिय विभूति शंखधर साख्वाः प्रतिष्ठानया प्रतिनिधिमण्डलं प्रधानमन्त्री शेरबहादुर देउवायात नाप लाःगु दु । प्रतिष्ठानया नायः ज्ञानराम श्रेष्ठया नेतृत्वय् वंगु प्रतिष्ठानया प्रतिनिधिमण्डलं प्रम देउवायात नाप लाःगु खः ।
प्रतिष्ठानया नायः श्रेष्ठं प्रम देउवायात थुगुसी थिमिइ जुइगु न्हूदँया ज्याझ्वलय् मूपाहांकथं ब्वति कयादीत इनाप यानादीगु खः । वय्कलं दँय्दसं नेपाल संवत्या न्हूदँ कुन्हु नेपाल संवत्या प्रवर्तक राष्ट्रिय विभूति शंखधर साख्वाःया झ्वाताय् सरकार प्रमुखया ल्याखं माल्र्यापण यायेगु परम्परा दया वयाच्वंगुलिं उगु ज्याझ्वलय् मूपाहांकथं झायाः शंखधरया झ्वाताय् मल्यार्पण यानादीत प्रम समक्ष इनाप यानादीगु खः ।
प्रतिष्ठानया संस्थापक नायः मदनकृष्ण श्रेष्ठं प्रतिष्ठानं याना वयाच्वंगु थीथी गतिविधिया बारे प्रमयात जानकारी याकादीगु खः ।
प्रम देउवां नेपाल संवत्या न्हूदँलिसें नेपाल संवत्या प्रवर्तक राष्ट्रिय विभूति शंखधर साख्वाःया बारे थः परिचित जूगु खँ धयादीगु खः । प्रम देउवां नेपाल संवत्या न्हूदँ, राष्ट्रिय विभूति शंखधर साख्वाःया योगदानया बारे थः परिचित दुगु खँ धयादीगु खः ।
लिसें प्रम देउवां प्रतिष्ठानं स्थापनाकालनिसें नेपाल संवत् व राष्ट्रिय विभूति शंखधर साख्वाः व वय्कःया योगदानयात कयाः याना वयाच्वंगु ज्याझ्वःयात कयाः च्वछायादीगु खः ।
उगु इलय् प्रतिष्ठानया नायः श्रेष्ठं श्रेष्ठं नेपाल संवत् व राष्ट्रिय विभूति शंखधर साख्वाःया बारे जानकारी याकेगु नापं प्रतिष्ठानया गतिविधि सम्बन्धी सफू प्रम देउवायात लःल्हानादीगु खः ।
प्रतिष्ठानया नायः श्रेष्ठलिसें मध्यपुर थिमि नगरपालिका प्रमुख सुरेन्द्र श्रेष्ठ, प्रतिष्ठानया पुलांम्ह नायः श्यामकृष्ण मानन्धर, उपाध्यक्ष सुरेश प्रधान, सहसचिव विनोद कोजूसहितया प्रतिनिधिमण्डलं प्रमयात नाप लाःगु खः ।्
LEAVE YOUR COMMENTS