‘पार्टी जेठ २ लय् अःपुक लिहां वनी मखु’
येँ – नेकपा एमालेया अध्यक्ष केपी ओलीं एमाले पार्टी २०७५ जेठ २ गतेया अवस्थाय् गथे खः अथे हे लिहां वने मफइगु खँ धयादीगु दु । एमाले कास्की जिल्लां म्हिगः पोखराय् ग्वसाः ग्वःगु कार्यकर्ता भेलायात सम्बोधन यासें ओलीं १० बुँदे सम्झौता नं समस्या ब्वलंकेगु लागिं मखुसें समस्या समाधान यायेगु नितिं यानागु खः धयादीगु दु ।
सम्बोधनया झ्वलय् वय्कलं धयादिल, ‘नेकपा दर्ता बदर जूसां नं नेकपा (एमाले) व माओवादी सर्लक्क बिस्कं जूगु मखु । उगु खँ कानुनी खँ जुल, जिमिसं पार्टी एकीकरण २०७५ जेठ ३ गते यानागु खः, उगु एकीकरण कायम हे दु, प्रचण्ड गुट बिस्कं च्वं वन, माओवादी केन्द्रपाखें वःपिं आपालं पासापिं आः नं थ्वहे पार्टीइ दु, थुगु पार्टीया आःया नां नेकपा (एमाले) या खः, थ्व म्हिगःया नेकपाया नं निरन्तरता खः, एकीकरणया नं निरन्तरता खः ।’
वय्कलं गुलिखे थासय् म्वाःसां म्वाःसां जेठ २ गतेया प्रसंग हयेगु यानाच्वंगु दु धासें जेठ २ गते धइगु श्राद्धय् भौचा ची थेंज्याःगु ज्या मखु धयादिल । वय्कलं धयादिल, ‘थ्व ला पार्टीयात गतिशील दयेकेत व समस्या खने दत धाःसा समस्या ज्यंकेत खः, थ्व गुगुं पार्टीलिसे यानागु सम्झौता मखु, जिमिसं माधव नेपालयात नं पार्टी तमछ्यायेमा धकाः दयेकागु कार्यदल खः, उगु कार्यदल क्षति पनेगु नितिं दयेकूगु खः, माधव नेपालं अस्वीकार यात ।’
वय्कलं १० बुँदे सहमतियात उपयोग यासें पार्टीया समस्या ज्यंकाः, भ्रम व अलमलय् लाःपिं नं पार्टी दुने हयाः पार्टीयात बल्लाकेगु जूगुलिं उकियात ख्याः मतायेकेत इनाप नं यानादिल ।
अध्यक्ष ओलीं १० बुँदे सहमतियात कयाः यानादीगु थ्व टिप्पणी न्यनाः माधव नेपाल पुचःयात त्वःताः एमालेय् वंपिं नेता कार्यकर्तात धाःसा अजूचाःगु खँ सूत्रं धाःगु दु । उमिसं पार्टी दुने नं थुकिया बारे खँ तयेगु हे यानाच्वंगु दनि ।
LEAVE YOUR COMMENTS