
येँ -युवा बौद्ध समूह व लुम्बिनी नेपलिज् बुद्धधर्म सोसाइटी यूकेया मंकाः ग्वसालय् जूगु बुद्ध धर्म सम्बन्धी निबन्ध कासाय् त्याःपिंत शनिवाः छगू ज्याझ्वःया दथुइ सिरपाः लःल्हायेगु ज्या जुल ।
थनया बुद्ध विहारय् जूगु उगु ज्याझ्वलय् विहारया प्रमुख लिसें अखिल नेपाल भिक्षु महासंघया महासचिव भिक्षु कोण्डन्य महास्थविरं त्याःपिंत सिरपाः लःल्हानाबिज्याःगु खः ।
थुगु दँय् ‘बुद्ध धर्मय् कर्मया भूमिका’ विषयय् जूगु उगु निबन्ध कासाय् प्रमिला ताम्रकार तुलाधर न्हाप लाःगु खःसा जमुना गोसाइँ लिउ, पलिस्था मानन्धर लियां लिउ व विद्यालक्ष्मी शाक्ययात हःपाः सिरपाः लाःगु खः ।
समूहया अध्यक्ष मदनबहादुर तुलाधरया सभापतित्वय् जूगु उगु ज्याझ्वलय् न्ववासें मूपाहां भिक्षु कोन्डण्यं बुद्ध धर्मयात व्यवहारय् छ्यलेगु खँय् कर्मया यक्व महत्व दुगु खँ कनादिल ।
ज्याझ्वलय् निर्णायक पुचःया दुजःपिं डा. सुरेन्द्रमान वज्राचार्य, डा. त्रिरत्न मानन्धर, लुम्बिनी नेपलिज् बुद्धधर्म सोसाइटीया सुचिता तुलाधर, नेपालभाषा टाइम्सया सम्पादक सुरेश किरण लिसें सिरपाः त्याकूपिं मय्जुपिंसं नं नुगःखँ प्वंकादीगु खःसा पञ्चवीर सिंह सिरपाःया दाता पञ्चवीर सिंह तुलाधर नं पाहां कथं झाःगु खः ।
ज्याझ्वलय् युवा बौद्ध समूहया न्वकु राजु शाक्यं लसकुस यानादीगु खःसा सचिव रजनी ताम्राकारं सुभाय् देछानादीगु खः । उगु निबन्ध कासाय् मुक्कं २२ म्हेस्यां ब्वति काःगु खः ।
LEAVE YOUR COMMENTS