वनोद्यान विहारय् कथिन चीबर दान

थेच्व(नेपालभाषा टाइम्स)- थनया सिमासी गलय् च्वंगु वनोद्यान बुद्ध विहारय् वंगु कथिन चीवर दान ज्याझ्वः जुल । श्रद्धेय भिक्षु सुमनं वर्षावास पूवंका बिज्याःगु लसताय् उगु कथिन चीवर दान ज्याझ्वः जूगु खः।

लुम्बिनी विश्वविद्यालयया प्रा. डा. संकिश्च महास्थविरं पंचशील बियाबिज्याःगु खःसा श्रद्धेय भिक्षु पञ्ञारतनं चीवर दानया महत्वयात कयाः धर्मदेशना बियाबिज्याःगु खः ।

न्याम्ह दाताया मंकाः ग्वसालय् न्ह्याःगु कथिन दानय् दातापिंपाखें सुन्जला शाक्यं अखिल नेपाल भिक्षु महासंघया महासचिव श्रद्धेय भिक्षु धर्मगुप्त महास्थविरयात कथिन चीवर दान यानादीगु खः ।

आपालं उपासक उपासिकया उपस्थिति दुगु ज्याझ्वलय् धर्मगुप्त महास्थविरपाखें पुण्यानुमोदन याना बिज्याःगु ज्याझ्वलय् विहारय् पलिस्था यायेत्यंगु बुद्ध मूर्तिया निंतिं नं चन्दा व दान संकलन याःगु खः।

विहारय् २१ फुट तःधिकःम्ह धातुया बुद्ध मूर्ति पलिस्था यायेगु तयारी जुयाच्वंगु विहारं जानकारी बिउगु दु ।