फास्ट टय्कया मुआब्जाय् मुद्दा तइगु
येँ – येँ–निजगढ फास्ट ट्राय्कय् सरकारं निर्धारण यानातःगु मुआब्जा उचित मजू धासें स्थानीय वासिन्दातय्सं अदालत वनेगु तयारी याःगु दु । फास्ट ट्राय्कय् थःगु नं जग्गा लाःम्ह बुंगया इन्द्रमान तुलाधरं मुद्दा तयेगु बारे वकिलनाप सहलह जुयाच्वंगु खँ कँसें याकनं मुद्दा दायर जुइगु जानकारी बियादिल ।
मेखे फास्ट ट्रायकया जीरो प्वाइन्ट गन तयेगु धयागु खँय् धाःसा विवाद जारी हे जुयाच्वंगु दनि । जीरो प्वाइन्टयात कयाः सरकारं स्पष्ट निर्णय यायेमफुगुलिं फास्ट ट्रायक दयेकेगु ज्या नं लिबानाच्वंगु दु । न्यादँया दुने फास्ट ट्राय्क दयेके क्वचायेकेमाःगु खःसां दछि दयेधुंकाः नं उकिया ज्या न्ह्याके फयाच्वंगु मदु ।
‘सरकारं फास्ट टय्क दयेके फइ मखु’ थ्वहे दथुइ सरकारं थःगु स्रोतं येँ–निजगढ फास्ट ट्राय्क दयेके मफइगु खँ धाःगु दु । थःगु हे स्रोतं फास्ट ट्राय्क दयेकेबलय् विकास निर्माणय् असन्तुलन खनेदइगुलिं विदेशी ग्वाहालि मालेमाःगु खँ धाःगु दु । सरकारं विदेशी ग्वाहालि मालेगु प्रक्रिया नं न्ह्याकेधुंकूगु खँ मन्त्रालय स्रोतं धाःगु दु ।
तःधंगु आयोजना नेपालं दयेकेबलय् आर्थिक भार अप्वः लाइगु जूगुलिं विदेशी स्रोत मालेत्यंगु खः । तर छु विदेशी संस्थायाके सरकारं आर्थिक ग्वाहालि कायेत्यंगु खः धइगु बारे धाःसा स्पष्ट मजूनि । नेपाःया सेनां फास्ट ट्राय्क दयेकेगु जिम्मा कयातःगु दुसा आः लँ दयेकेगु निंतिं माक्व खर्च यायेत सरकारया धुकुती ध्यबा मदुगुलिं विदेशी सहयोग मालेमाःगु अवस्था वःगु खः ।
फास्ट ट्राय्क दयेकेत १ खर्ब १० अर्ब स्वयां अप्वः ध्यबा खर्च जुइगु सम्भाव्यता अध्ययनय् न्ह्यथनातःगु दु । येँनं तराई स्वाइगु ७६ किलोमिटरया थ्व दकलय् चीहाकःगु लँपु खः ।
LEAVE YOUR COMMENTS