किसमिसय् दु यक्व हे गुण

झी मसला प्वःचिइबलय् तयेमाःगु छता किसमिस नं खः । थ्व चाकुसे च्वनाः साःगु मसला (ड्राइ फ्रुट) खः । थुकियात मरिचरि, तरकारि, पुलाउ आदिइ ल्वाकछ्याना बिइबलय् सवाः न साइ, अले पौष्टिकता नं अप्वः । थ्व स्वकं नःसां मेमेगु मसला काजु, मस्र्याबरां, ख्वःसिं आदिलिसे ल्वाकछ्यानाः नःसां झीत तागत द हे दइ । थुकिं सने हे मास्ति मवःपिंत नं फुर्ति वयेका बिइ । सुथय् कौला यायेबलय् २५ ग्राम किसमिस नं नयेगु याःसा यक्व हे फाइदा जुइ ।
किसमिस अंगूरयागु दयेकीगु खः । पु मदुगु जातयागु अंगूर गंकाः दयेकातःगु किसमिस जुइसा पु दुगु अंगूर गंकाः दयेकातःगुयात मुनक्का दाख धाइ ।
किसमिसय् दइगु पोषक तत्व थुकथं दु – कार्बोहाइड्रेट ७७.३ प्रतिशत, प्रोटीन २ प्रतिशत, चिल्लो ०.२ प्रतिशत, व लः १८.५ प्रतिशत । थुलि बाहेक थुकी क्याल्सियम, फोस्फोरस व आइरन नं छुं भचा दइ । थुकी भिटामिन बी कम्प्लेक्स प्रशस्त मात्राय् दइ । प्रत्येक १०० ग्राम किसमिसं झीत ३१९ क्यालोरि ऊर्जा प्राप्त जुइ । किसमिसय् दुगु चाकुगु पदार्थ म्हं याकनं पचय् याइ । थुकी दुरुइ दइगु दक्व हे धयाथें गुण दु, अले दुरु स्वयां थ्व याकनं पचय् जू । उकिं दुरु मदइबलय् उकिया पलेसा पाउडर दुरु छ्यलेगु पलेसा किसमिस नकाबिइगु हे बांलाः । दुरु त्वनेबलय् प्वाथय् वायु थहां वइपिंत नं किसमिस नकाबिइगु हे वेश जुइ ।
म्हासुल्वय् (जण्डिस) जूपिंत नं किसमिस नकेगुलिं फाइदा जुइ । म्हासुल्वय् धयागु लीभरया कमजोरी व म्हय् हि मगानाः जुइगु खः । किसमिसय् आइरन ४ प्रतिशत दइगु जूगुलिं थुकिं हि अप्वयेका बिइ । लिभर कमजोर जुइगु जुयाः म्हासुल्वय्या ल्वगियात अप्वः थें कब्जियतं दुःख बिइ । किसमिस कब्जियत नाश यानाबिइ । थ्व कारणं हे म्हासुल्वय्या ल्वगियात किसमिस नकेगुलिं फाइदा याइ ।
मिजंतय्त जुइगु धातु क्षीणता व स्वप्नदोष थेंज्याःगु ल्वय् वीर्य छ्वालुयाः जुइगु खः । छवालुगु जुयाः हे भतिचा उत्तेजना जुइवं हे वीर्य पिहां वइगु खः । किसमिस नयेगु यातकि वीर्य अप्वः दयावइ । लिसें ताकुसे नं च्वनी । उकिं स्वप्नदोष यक्व जुइवं व वीर्य स्खलन याकनं जुइपिं मनूतय्सं निला तक न्हिं न्हिं सुथय् २५ ग्राम किसमिस नयाबिइमाः, समस्या मदयावनी ।
लः जायाः मिजंतय् सिफा मनावल धाःसा छुं न्हि तक नियमित किसमिस नयाबिइमाः, फाइदा जुयावइ ।
कफ विकृति, अजीर्ण, अपच आदि कारणं सासः नवल धाःसां छुं न्हि तक न्हिं न्हिं किसमिस भचाभचा न्ह्ययाः न्ह्यःया नयाबिइगु यायेमाः, सासः नमवयावनी ।
किसमिसय् कार्बोहाइड्रेट यक्व दुगुलिं चिनिल्वय् (डायबिटिज) दुपिंसं नयेमजिउ । किसमिस झारा जुइकीगु चीज जूगुलिं डायरिया जूपिंसं नयेमजिउ । किसमिस गरम प्रकृतियागु जूगुलिं बर्खां म्हय् थाय्थासय् कै वयाः हैरान जुइमाःपिं मस्तय्त नं नकेमजिउ ।