पःका छताजि गुणकारी मसला खः । थुकी यक्व हे वासःया गुण दु । अचार फीबलय् पःका थ्यंमथ्यं दक्वं हे अचारय् तयेगु याइ । वासःया रुपय् छ्यलाः पःकां यक्व हे ल्वय्यात ख्यानाछ्वयेफु । पःका काचाक्क स्वयेबलय् तू थें च्वनी, तर थ्व तू स्वयां भचा चिग्वः जुइ । ख ला थुकिया छ्यलाबुला मसलाया रुपय् जुइगु खः, तर थुकी चिकंया अंश नं यक्व हे दइ ।
थुकिया सवाः भचा खखः धाइ । थ्व गरम प्रकृतियागु चीज खः, अथे जुयाः थुकिं पाचक अग्नि बल्लाकी, रुचि अप्वयेकी । गरम जुइगुलिं यानाः वात व कफ मदयेकाबी । थुकिं यानाः वात व कफया यक्व थें ल्वय् लनावनी । प्वाः स्याःगु, म्ह स्याःगु लंकाबी, अले प्वाथय् दायाच्वंपिं कीत स्यानाबी । आउँ जूपिंत, हिकु वयाच्वंपिंत व सासःया ल्वय् जुयाच्वंपिंत नं पःकां फाइदा याः ।
पःकाय् दुगु वासःया गुण
# पःकाया सेवनं नयेपित्याकी । थुकिं पाचनशक्ति बल्लाकी। पाचन अग्नि तेज जुलकि नयेगु नसा नं प्वाः जायेक नयेफइ ।
# पःकाया सेवनं प्वाथय् दयावइगु ग्यासं नं मुक्ति दइ ।
# पःका लखं झीगु प्वाःयात यक्व हे फाइदा याः । सुयातं सासःया ल्वय् दुसा, दम थहां वयाच्वन धाःसा व भतिचा जक न्यासि वंसां स्येंस्यें वःसा पःकाया च्या त्वंकादिसँ ।
# अपच जुयाच्वंसा वा हैजा जूसा वा छ्यंगूया ल्वय् – थ्व सकतांयात पःकां फाइदा याः । महिनावारी गडबड जूसा अथवा तिल्वय् जूसां नं पःकां उपचार यायेगु सम्भव जू ।
# प्वाः स्यानाच्वंगु दुसा अथवा सेखं चायाच्वंगु दुसां नं पःकां उपचार यायेगु सम्भव जू ।
# तिल्वय् दुपिंत बेहोस जुइगु धयागु सामान्य खँ खः । अथे बेहोस जुइबलय् पःका कयाः निनादिसँ, अले यचुगु कापः छकुतिइ प्वःचिनादिसँ, थ्व ल्वगियात नतुंकादिसँ, होसय् वइ ।
# सेखं चायाच्वंगु दुसा पःकाः निगःचा निनाः उकी कस्ति ल्वाकछ्यानादिसँ । पःकाः दुगु कस्ति सेखं चायाच्वंम्हेसिनं नतुनादिसँ, अले छगू चम्चा नया नं दिसँ । प्यघौ प्यघौ पाकाः थथे नतुनेगु व नयेगु यानाच्वनादिसँ, सेखं लनावनी ।
# मन ग्याःथें जुयाच्वन, छु याये छु याये जुयाच्वन, अले म्ह नं भचा खाः थें जुयाच्वन धाःसा थःगु ल्हातय् व तुतिइ पःकाया पेस्टं बुलादिसँ, याउँयावनी ।
# नःसा पचे मजू, गबलें पाउँक धक्काः वःसा गबलें वायु थहां वः । थज्याःगु अवस्थाय् छगू चम्चाय् प्यब्वय् छब्वः पःकाचुं कयाः बागू गिलास लखय् ल्वाकछ्यानाः त्वनादिसँ । अपचया समस्या जुइमखु ।
# पःका निनाः लः ल्वाकछ्यानाः अचार थें दयेकाः लेप तयाबिलकि न्हाय्पंया क्वसं मनावःगु, साहा (जोर्नी) स्याःगु याक्वय् गुलिचा वःगु, तुयुगु चातः, छ्यं स्याःगु आदि लनावनी ।
# मस्तय् प्वाथय् वायु मुनाच्वन धाःसा पःकाया लेप त्यपुचिया छचाःखेरं तयाबीमाः ।
# पिसाब खोले मजुल धाःसा पःकाया लेप क्वप्वाथय् तयेमाः ।
# वा स्याःसा पःका क्वाःलखय् तयाः कुल्ला यानाबीमाः ।
# पःकाया चिकनं छ्यनय् कै वःसा पुँइ चिन धाःसा सँ हाल धाःसा यक्व हे फाइदा याइ ।
# म्हय् गनं नं स्यानाच्वन धाःसा पःका निनाः ख्वाउँलखय् ल्वाकछ्यानाः स्याःथाय् लेप तयादिसँ, पःकाःया लेप तये स्वयां न्ह्यः म्हया उगु ब्वय् गन लेप तयेगु खः, अन सालुगु यचुगु कापः लायादिसँ, अले उकी द्यःने जक तयादिसँ । लाय् लाक तप्यंक लेप तयाबिल धाःसा ला ह्याउँयावइगु, अले कै वइगु सम्भावना दइ ।
# प्वाः तसकं स्यात धाःसा नं पःकाया लेप तयेबलय् याउँसे च्वनी । नयागु छुं चीज पचे मजुल, अले भयंकर अपच जुल धाःसा बागू चम्चा पःकाचुं लखय् संकाः त्वनेगु यायेमाः, फाइदा जुइ ।
# हैजाया ल्वगियात झारा नं जुयाच्वंगु दु, बान्ता नं जुयाच्वंगु दु, अले छेँय् वयात नकेत वासः नं छुं मदुसा उगु इलय् प्वाथय् पःकाया लेप तयाबीगु लाभदायक सिद्ध जुइ ।
# अपच जुयाः वा मेगु छुं कारणं हिकु वल धाःसा लःया लिसें चि छप्ति व पःकाचुं छप्ति काल धाःसा फाइदा जुइ ।
# मिसातय् महिनावारी जुइबलय् अप्वः कष्ट जुल वा बांलाक खोले मजुल धाःसा जा नयेबलय् वा छुचुंमरि नयेबलय् न्हापांगु प्यय् पःकाचुं भतिचा तयाः काल धाःसा फाइदा जुइ ।
# सेखं चाइबलय् पःका कस्तिलिसे फ्ययाबिल अथवा नतुनाबिल धाःसा फाइदा जुइ । थुकी कफ नं ब्वलावयेकी । प्वाथय् कफ दुसा क्वाःलः लिसे पःकाः बिल धाःसा कफ अःपुक हे पिहां वइ ।
# हाया वयाच्वंगु सँ, उकी तुँचा नं दु धयागु खःसा चछि पःका लखय् फ्वयादिसँ, अले सुथय् थ्व लखं सँ चायादिसँ, फाइदा जुइ । पःका निनाः थुगु पेस्टयात हेयरप्याकया रुपय् नं छ्यलेफु । थुकिं नं फाइदा जुइ ।
सावधान
पःका गरम याइगु चीज जूगुलिं रक्तपित्त, रक्तवात, हि खनेदुगु अलःकै, म्ह हियुगु, इकुइगु, ब्लड प्रेसर हाइ जूपिंंसं पःका सेवन यायेमजिउ ।
LEAVE YOUR COMMENTS