न्हूगु शैक्षिक सत्र सुरु यायेत नं अन्योल

येँ- कोरोना भाइरसया कारणं देय्न्यंकं ‘लकडाउन’ जुयाच्वंगु कारणं न्हूगु शैक्षिक सत्र गुबलय् निसें न्ह्याइ धइगु नं अनिश्चित जुयाच्वंगु खँ नेसनल प्याब्सनया केन्द्रीय दुजः व फ्युचर स्टार इङलिस बोर्डिङ स्कुल डल्लुया फाउन्डर प्रिन्सिपल मनोज श्रेष्ठं कनादीगु दु ।

वैशाखया न्हापांगु वालंनिसें न्हूगु शैक्षिक सत्र न्ह्याकेमाःगु खःसा नं लकडाउनया कारणं यानाः शैक्षिक सत्र न्ह्याकेगु अन्यौल जुयाच्वंगु खः । सरकारं गज्याःगु नीति हइ वकथं हे नेसनल प्याब्सन न्ह्याःवनिगु खँ धयादिसें वय्कलं कोरोना भाइरसया संक्रमणया खतरा म्हो जुया वन धाःसा वैशाखया निगूगु वालंनिसें न्हूगु सत्र न्ह्याकेफइगु खँ धयादिल ।

वय्कलं आपालं विद्यार्थी थःथःगु गामय् वनाच्वंगुलिं नं थप समस्या जुयाच्वंगु खँ कनादिसें विद्यार्थीपिं दक्व लिहां मवयेकं स्कुल सञ्चालन यायेमफइगु खँ नं कनादीगु दु ।

उकथं हे जगत सुन्दर ब्वनेकुथिया प्रिन्सिपल सुनिता मानन्धरं न्हूगु सत्र न्ह्याकेगु समस्या जुयाच्वंगु खँ कनादीगु दु । वय्कःया कथं वंगु चैत्र २० गते हे विद्यार्थीयात रिजल्ट बियाः वैशाखया न्हापांगु वालंनिसें न्हूगु सत्र न्ह्याकेगु योजना दुगु खःसां लकडाउन ताःहाकः जुयाः वनाच्वंगुलिं वैशाखया निगूगु वालंनिसें जक न्हूगु शैक्षिक सत्र न्ह्याकेफइगु खँ कनादिल । वय्कलं धयादिल, ‘लकडाउन’ ताःहाकः जुल धाःसा वैशाख निगूगु वालं नं न्हूगु शैक्षिक सत्र न्ह्याकेत समस्या जुइफु ।

गुलिखे स्कूलय् जाँच नं क्वमचाःनिवं लकडाउन जूगु खःसा जाँच सिधःगु स्कूलय् नं कापी जाँच यायेत समस्या जुयाच्वंगु दु । अथे जूगुलिं नं न्हूगु सत्र चायेकेगु खँय् अन्योल हे दयाच्वंगु दनि ।

काठमाडौं मोर्डन इङलिस स्कुलया प्रमुख कार्यकारी अधिकृत राजेन्द्र महर्जनं सरकारी निर्णय मवयेकं स्कुलं छुं हे यायेफइगु अवस्था मदु धासें सरकारया निर्णय लिपा जक स्कुल सञ्चालनय् हयेफइगु खँ कनादिल ।

अथे हे न्यू जेनिथ इङलिस स्कुलया प्रिन्सिपल राजु महर्जनं विद्यार्थीया रिजल्ट पिकायेत तकं थाकुयाच्वंगु खँ कनादिसें सरकारी निर्णय लिपा जक स्कूलया न्हूगु सत्र सञ्चालनय् वयेफइगु खँ कनादी । स्कुल सञ्चालनया निंतिं सरकारं छुं हे निर्णय मयानिगु धासें थःपिं सरकारया निर्णय पियाच्वनागु खँ नं कनादीगु दु ।