गुथि विधेयक हानं हयेगु तयारी

सरोकार समुदायलिसे वार्ता याइगु

येँ – देय्न्यंकंया नेवाःतय्सं याःगु कडा विरोधया कारणं सरकारं लित काःगु गुथि विधेयक आः हाकनं तयेगु तयारी यायेवं थुकिया बारे चिउताः तयाच्वंपिं आन्दोलनकारीतय्सं नं थुखेपाखे ध्यान बियाहःगु दु । खास यानाः भूमि सम्बन्धी ज्यायात व्यवस्थापन यायेगु लागिं सरकारं थ्व विधेयक हःगु खःसा उकी गुथिया जग्गायात नं थीगु ज्या जुइवं स्वनिगःया जनतां कडा प्रतिवाद याःगु खः ।

आः विधेयकयात न्ह्यःने यंके न्ह्यः थ्व विषययात कयाः सरोकारवालातलिसे वार्ता यायेगु खँ भूमिसुधार मन्त्री पद्मा अर्यालं धयादीगु दु । वंगु विहीवाः च्वंगु मन्त्रिपरिषद् बैठकं गुथि विधेयक हानं यंकेगु निर्णय याःगु खः । लिसें थ्व विधेयकया गुगु बुँदाय् विवाद दुगु खः उकियात मदयेकेगु लागिं सरोकारवालातलिसे संवाद यायेगु धकाः नं निर्णय याःगु खः ।

गुथिलिसे आवद्ध संस्था व व्यक्तितलिसे संवाद यायेगु लागिं सत्तारुढ दल नेकपाया निर्वाचित जनप्रतिनिधितय्सं नं पहल यायेगु संकेत बिउगु दु । थ्व विवाद तच्वयाच्वंगु इलय् नं छुं सांसदतय्सं विवाद समाधान यायेगु लागिं पहल यानादीगु खः । लिसें येँ मनपाया मेयर विद्यासुन्दर शाक्यं नं मन्त्री, प्रधानमन्त्री व राष्ट्रपतियात समेत नापलानाः पहल कयादीगु खः ।

येँ मनपां आपालं गुथि सञ्चालन यायेमाःपिं थीथी जातीय समुदायतलिसे नं अलग अलग अन्तक्र्रिया यानाः उमिगु राय कायेगु ज्या याःगु खः । सरकारं गुथि विधेयक हानं हइगु समाचार सार्वजनिक जुइवं थ्व सम्बन्धी आन्दोलनय् सक्रिय जूपिं व्यक्ति व संस्थात नं हानं सचेत जूगु दु । आः सरकारं थःपिलिसे संवाद यात धाःसा छु खँ न्ह्यःने तयेगु धकाः सरोकारवाला संस्थातय् दथुइ थवंथवय् खँ ब्याकेगु तयारी जूगु खँ नं सीदुगु दु ।

गुथि बारे नेवाः धारणा
गुथि विधेयक विरुद्ध आन्दोलन याना वयाच्वंगु पुचःतय्सं राज्य समक्ष न्ह्यब्वयेगु लागिं छुं ई न्ह्यः छगू अवधारणापत्र नं तयार याःगु दु । ‘गुथि – नेवाः समुदायया अवधारणा’ शीर्षक तयाः मल्ल के. सुन्दरजुं तयार यानादीगु उगु बिचाःयात गुथि आन्दोलनकारीतय्सं थःपिनि मूल धारणा दयेकूगु खः ।

उकी गुथि धइगु आदिवासी नेवाःतय्गु छगू प्रथाजन्य संस्था जूगु कारणं उकियात राज्यं नियन्त्रण यायेगु मखुसें स्वायत्त व स्वतन्त्र रुपं सञ्चालन याके बीमाः धकाः न्ह्यथनातःगु दु । बरु थ्व प्रथाजन्य संस्थायात संरक्षित व व्यवस्थित यायेगु लागिं राज्यं संयोजनकारी भूमिका म्हितेमाः धकाः नं उकी धयातःगु दु ।

सम्बन्धित बुखँ

LEAVE YOUR COMMENTS