ने. सं. ११४६ बछलागा चौथी -

थुगुसी गोकर्ण मेला मजुइगु

येँ – थुगुसी अबुया ख्वाः स्वयेगु दिंकुन्हु गोकर्ण मेला मजुइगु जूगु दु । अबुया ख्वाः स्वयेगु दिंकुन्हु जुइगु गोकर्णेश्वर महाद्यःया मेला थुगुसी स्थगित याःगु खः ।
गाकर्णेश्वर महाद्यः मन्दिर क्षेत्र प्रबन्ध समितिया आः नकतिनि च्वंगु बैठकं कोरोना भाइरस संक्रमणया जोखिम कायम हे दुगु धासें वइगु गुंलागा आमाइ (भदौ २२) गते जुइगु मेला स्थगित यायेगु निर्णय याःगु खः ।

समितिया अध्यक्षलिसें गोकर्णेश्वर नगरपालिका वडा नं. ४या अध्यक्ष कुमार श्रेष्ठं कोरोना संक्रमणया जोखिम ल्यना हे च्वंगु अवस्थाय् लखौंया भक्तजनत वइगु मेला यायेगु उचित मजूगुलिं स्थगित यायेगु निर्णय जूगु जानकारी बियादिल ।

अबुया ख्वाः स्वयेगु दिं गोकर्ण औसीया दिनय् गोकर्णेश्वर महाद्यःयाथाय् थः मदुपिं अबुया नामय् जलदान, श्राद्ध, पिण्डदान आदि यायेत लखौंया ल्याखय् भक्तजन वयेगु याः ।