छाय् थहां मवंगु जुइ नेपाःया जनसंख्या ?

येँ – केन्द्रीय तथ्यांक विभागं म्हीग सार्वजनिक याःगु नेपाःया न्हूगु जनगणना अप्वःस्या लागिं आश्चर्यया विषय जूगु दु । खास यानाः नेपाःया जनसंख्या अझ नं स्वंगू करोड स्वयां अप्वः मथ्यंगु खँय् यक्वस्यां आश्चर्य प्वंकूगु खः ।

थनिं झिदँ न्ह्यः हे सामान्यतया मनूतय्सं न्ववाइबलय् ‘तीन करोड नेपाली जनता’ धायेगु याना वयाच्वंगु खःसा झिदँ लिपा तकं नेपाःया जनसंख्या स्वंंगू मथ्यंगु खनाः मनूत अजूचायाःगु खः । उकिं नेपाःया जनसंख्या छाय् वृद्धि मजूगु जुइ धइगु खँय् समाजशास्त्री, मानवशास्त्री, अर्थशास्त्रीतय् दथुइ चर्चा शुरु जूगु दु ।

जनसंख्या बढे मजूगुया मू कारण ला नेपाली समाजय् नं थौंकन्हय् निम्ह स्वयां अप्वः मचा मबुइकेगु प्रवृत्ति विकास जुया वःगुलिं हे खः धया हःगु दु । शहरी जीवन तसकं प्रतिस्पर्धात्मक जुइगु जुयाः थौंकन्हय्या मिस्तय्सं थःगु ‘करिअर’ या लागिं नं यक्व मचा बुइकेगु मयाः ।

कामकाजी तिपूतय्सं अझ छम्ह जक मचा दयेकीगु क्रम अप्वयाच्वंगु दु । झिदँ न्ह्यः तक नं छम्ह मिसां औसत ४–५ म्ह मचा बुइकेगु याइगु खःसा आः थ्व ल्याः १–२ म्हय् कुहां वःगु खँ तथ्यांकं क्यंगु दु ।