ने. सं. ११४३ तछलाथ्व त्रयोदशी -

कर मपूपिनिगु सेवा २४ गतेनिसें बन्द

येँ- येँ महानगरपालिकां तक्वःमछिं ताकेता यानाः नं कर मपूपिं करदाता सेवा रोक्का यानाबीगु जूगु दु । महानगरपालिकाया राजस्व विभागं वइगु भदौ २४ गतेया दुने नं कर मपुल धाःसा अज्याःपिं करदाताया सेवा रोक्का यायेगु धासें सूचना तिकूगु दु ।

महानगरपालिकां छेँबुँलिसें सम्पत्ति कर बुझे मयाःपिं न्हय्गू तःधंगु करदाताया लुखाय् हे वनाः उकथं कर पुलेत इनाप यासें कर मपूपिं करदाताया सेवा रोक्का यायेगु धासें सूचना टाँस याःगु खः । २४ गते दुने नं कर मपुल धाःसा वयां लिपा अज्याःपिं करदाताया सेवा रोक्का यायेगु जुइ धासें सूचना टाँस याःगु खः ।

येँ महानगरपालिकां कर पुलेत धासें थ्व स्वयां न्ह्यः नं सम्बन्धित करदाताया लुखाय् हे वनाः सुचं तिकेगु व माइकिङ तकं याःगु खः । येँ महानगरं वंगु असार १६ गते अज्याःपिं व्यक्ति व व्यवसायी करदाताया नां कर पुलेत धासें नां सार्वजनिक याःगु खःसा अनंलि साउन २४ गते निक्वःखुसी उकथं नां सार्वजनिक याःगु खः ।

न्हापांखुसी नीस्वम्हेसिया नां सार्वजनिक याःगु महानगरं निक्वःखुसी न्यय्निम्हेसिया नां सार्वजनिक याःगु खः । थुकथं निक्वः यानाः ७५ म्हेसिया नां सार्वजनिक याःगु खःसा उकीमध्ये आतकया दुने १० म्हेसिनं आंशिक रुपं कर पूगु व २० म्हेसिनं विवरणसहित कर पुलेत वयेगु प्रतिवद्धता प्वंकूगु विभागं जानकारी बिउगु दु ।

कर पुलेत सार्वजनिक रुपं इनाप यायेगुयालिसें माइकिङ तकं याःगु खः । थुकथं नां तिकाः, नां सार्वजनिक यानाः व माइकिङ यानाः नं कर पू मवःपिं व सम्पर्कय् मवःपिंत वइगु भदौ २४ गतेनिसें प्रचलित कानूनकथं कारवाही यायेगु व इमिगु सेवा नं रोक्का यायेगु विभागं स्पष्ट याःगु दु ।

लिपांगु इलय् सूचना टाँस याःगुलिइ वडा नं. १ या कान्तिपुर होटल, १३ वडाया होटल प्लाटिनम, १७ वडाया ह्वाइटफिल्ड स्कुल, २२ वडाया रञ्जना ट्रेड सेन्टर लगायतया दु । विभागया राजस्व अधिकृत प्रदीप कोइरालाया नेतृत्वय् नगर प्रहरीलिसें महिला नौमति श्रमिक सहकारीया पुचः करदाताया लुखाय् वनाः २४ गते दुने राजस्व विभागय् स्वापू तयेत इनाप यासें सूचं ब्वनाः न्यंकूगु खः । उगु इलय् सहकारीया मिसा पुचलं पञ्चेबाजंलिसें कर पुलेत इनाप याःगु खः ।