आकिवंनिसें पेन्सन व्यवस्था खारेज

येँ-प्रधानमन्त्री केपी ओली नेतृत्वया सरकारं म्हिगः थःपिनि न्हापांगु बजेट पेस यात । अर्थतन्त्री डा. युवराज खतिवडां म्हिगः १३ खर्ब १५ अर्ब १६ करोड १७ लाख तकाया बजेट न्ह्यब्वःगु खः । थ्व बजेटपाखें दकलय् अप्वः सरकारी कर्मचारी निराश जूगु दु । कर्मचारीतय्सं थुपालय् थःपिनि तलब बढे जुइ धकाः आशा यानाच्वंगु खःसां तलब बढे मजू, बरु महंगी भत्ता वृद्धि याना बिउगु दु ।

लिसें मेगु दँनिसें अवकाश प्राप्त कर्मचारीतय्त बिया वयाच्वंगु पेन्सन नं मबीगु जूगु दु । अवकाश प्राप्त कर्मचारीयात पेन्सन मबीगु घोषणा पुलांगु कांग्रेसया सरकारं हे याना तयेधुंकूगु खः । आः वर्तमान सरकारं पेन्सन पलेसा कर्मचारीया योगदानया आधारय् निवृत्तिभरण बीगु जूगु दु । वि.सं. २०७५ साउन १ गते लिपा जागीर नइपिं कर्मचारीतय्सं आः अवकाश लिपा पेन्सन काये खनी मखुत ।

बजेटं चालु आर्थिक दँय् आर्थिक वृद्धिदर ५.९ प्रतिशत थ्यनीगु अनुमान याःगु दु । थ्व न्हापाया तुलनाय् अप्वः खः । संघीय व्यवस्था कथं सरकारं प्रदेशतय्त ६३ अर्ब १ करोड ५५ लाख तका व स्थानीय तहयात १ खर्ब ९ अर्ब ८४ करोड ५६ लाख तका सशर्त अनुदान बीगु धकाः बजेट छुटे याःगु दु ।

नापं सरकारं वैदेशिक रोजगारीयात दुरुत्साहित यायेगु लागिं प्रधानमन्त्री रोजगार कार्यक्रम न्ह्यःने हःगु दु । न्हापा डा. बाबुराम भट्टराईया पालय् नं युवा स्वरोजगार कार्यक्रम धकाः थज्याःगु नीति हःगु खःसां उगु कार्यक्रम अन्तर्गत कार्यकर्तायात जक पोसे यायेगु ज्या जुल धकाः आलोचना जूगु दु । बजेटं दछिया दुने न्यागू लाख रोजगारी सिर्जना यायेगु महत्वाकांक्षी लक्ष्य नं न्ह्यःने हःगु दु ।
योग व ध्यान थेंज्याःगु माध्यमं नं मनूतय्त स्वस्थ याना तयेगु लागिं नागरिक आरोग्य कार्यक्रमयात बजेट मार्फत न्ह्यःने हःगु दुसा आयुर्वेद विश्वविद्यालय समेत स्थापना यायेत १० करोड दां फ्याःगु दु ।
शिक्षायात विशेष प्राथमिकता बियाः आः विद्यार्थीतय्त स्कूलय् हयेगु जक मखु हयाः टिके याना तयेगु ज्याझ्वः समेत न्ह्यःने हःगु दु ।