ओली विरुद्ध मेगु फैसला वयेफु !
येँ – अध्यादेश हयाः संवैधानिक परिषदं थीथी संवैधानिक निकायय् याःगु नियुक्ति विरुद्धया मुद्दां न्हूगु मोड काइगु सम्भावना खने दया वःगु दु । उगु रिट सम्बन्धी न्हापांगु न्हि व लिपांगु न्हिया सुनुवाइलय् प्रधानन्यायाधीश चोलेन्द्र शम्शेर जबरा मच्वनेगु जुइवं थज्याःगु संकेत खने दया वःगु खः । थ्व निन्हु वय्कः अनुपस्थित जूगुलिं आः वय्कः धुंकाःया वरिष्ठ न्यायाधीश दीपककुमार कार्कीया नेतृत्वय् नीस्वनीगु इजलासय् मुद्दाया सुनुवाई याइगु जूगु दु ।
न्हापांगु न्हि इजलास नीस्वनीगु इलय् प्रधानन्यायाधीश जबरा बिदाय् च्वनेधुंकाः वरिष्ठतम् न्यायाधीश कार्कीया नेतृत्वय् इजलास गठन जुइ । उगु हे इजलासं लिपा तकं उगु मुद्दाया सुनुवाइ याइगु जूगुलिं प्रधानन्यायाधीश जबरा मुद्दां अलग च्वनीगु जूगु दु ।
थगुने ३० मंसिरय् तत्कालीन प्रम केपी ओलीं संवैधानिक परिषद्य् प्रमुख प्रतिपक्षी मदुसां जिउ कथंया अध्यादेश हयाः निर्वाचन आयोग, लोकसेवा आयोग लगायत थीथी संवैधानिक निकायय् नियुक्ति याःगु खः ।
संवैधानिक नियुक्तियात कयाः म्हिगः हे सुनुवाइ यायेगु तयारी जूगु खःसा प्रधानन्यायाधीश विरुद्ध लाःगु मुद्दाय् जबरा संलग्न जुयाः सुनुवाई याये मजिउ धकाः वरिष्ठ अधिवक्ता गणेश त्रिपाठी व अधिवक्ता ओमप्रकाश अर्यालं अडान कायेवं म्हिगः प्रधानन्यायाधीश जबरां सुनुवाईया इलय् थः बिदाय् च्वनेगु धयादीगु खः ।
प्रधानन्यायाधीश जबरां संवैधानिक इजलास प्रधानन्यायाधीशया नेतृत्वय् हे गठन जुइगु व्यवस्था दुगुलिं थः बिस्कं च्वने मफइगु जिकिर यानादीगु खः, तर थुकी कानून व्यवसायीपिसं असहमति क्यनेवं वय्कलं ल्यं दुपिं प्यम्ह न्यायाधीशपिं लिसे सहलह यायेगु धासें इजलास त्वःतादीगु खः ।
वयां लिपा जूगु सहलहय् न्यायाधीशपिंसं जबरायात निकास बीत इनाप याःगु खःसा जबरां वइगु शुक्रवाः मुद्दाया सुनवाइ क्वःछीगु व वकुन्हु थः बिदाय् च्वनाः कायममुकायम न्यायाधीशया नेतृत्वय् गठन जुइगु इजलासं मुद्दाया सुनवाइ यायेगु व थुकिया फैसला जुइगु अन्तिम न्हि कुन्हु नं थः बिदाय् च्वनेगु विकल्प बियादीगु खः । वयां लिपा प्रधानन्यायाधीश जबरां रिट निवेदक अर्यालयात सःताः थम्हं हे उगु निर्णय न्यंकादीगु खः ।
तत्कालीन प्रधानमन्त्री ओलीया तसकं आलोचना जूगु थ्व प्रकरणया न्यायिक प्रक्रियापाखें प्रधानन्यायाधीश अलग च्वनीगु जूगुलिं आः थुकी नं ओलीयात लिच्वः लाइ कथंया फैसला वइगु खः ला धइगु आशंका जूगु दु ।
LEAVE YOUR COMMENTS