भाइरल जूगु ओलीया शपथ ग्रहण
येँ – प्रधानमन्त्री केपी शर्मा ओलीं म्हिगः शितल निवासय् पद व गोपनीयताया शपथ ग्रहण यानादिल । थ्व वय्कलं स्वक्वःगुखुसी प्रधानमन्त्रीया रुपय् शपथ ग्रहण यानादीगु खः । उकिया नापनापं वय्कलं पुलांगु हे मन्त्रिमण्डल कायम यासें उकिया सकलें दुजःतय्त नं हानं शपथ ग्रहण याकादीगु दु ।
म्हिगः शपथ ग्रहण यानादीबलय् प्रम ओलीं राष्ट्रपति विद्यादेवी भण्डारीयात ‘व म्वाः’ धकाः तप्यंक धयादीगु भिडियो धाःसा सामाजिक सञ्जालय् भाइरल जूगु दु । राष्ट्रपति भण्डारीं थःत बियातःगु शपथ ग्रहणया भ्वं स्वयाः न्ववानाच्वंगु इलय् ‘…जिं प्रतिज्ञा याना कि’ धयादिल । तर प्रम ओलीं उगु खँपु न्ववानामदी ।
राष्ट्रपति भण्डारीं लिसा कयाः वहे खँ उच्चारण यासेंलि प्रम ओलीं ‘.. व म्वाः’ धकाः स्यनादीगु खः । सम्भवतः राष्ट्रपतियात बियातःगु शपथ ग्रहणया भ्वं व प्रधानमन्त्रीयात बियातःगु भ्वं पाःगुलिं उकिया पाठ नं पानाच्वंगु जुइमाः ।
प्रम ओलीं राष्ट्रपतियात छुं मानवोधक सम्बोधन तकं मयासे ‘… व म्वाः’ धयादीगु खः । ओलीं अथे धायेवं राष्ट्रपति नं खिटिक्क न्हिलादीगु खः । प्रत्यक्ष प्रशारण जुयाच्वंगु उगु दृश्य आः सकभनं भाइरल जूगु दु ।
प्रम ओलीं ‘ईश्वर, देश व जनताया नामय् शपथ कया’ धायेमाःथाय् ‘ईश्वर’ मधासे ‘देश व जनताया नामय् शपथ कया’ जक धयादीगु खः ।
LEAVE YOUR COMMENTS