ने. सं. ११४६ तछलाथ्व पारू -

अक्सिजन मुयाः करोडौं क्षति

येँ -थनया ज्याथाय् म्हिगः सुथय् छखा छेँ मिं नयाः १० करोड तका स्वयां अप्वःया धनमाल क्षति जूगु दु ।
स्थानीय पुण्यतारा स्थापितया छेँया कुने तयातःगु ट्रेकिङ सामानया पसलय् च्वंगु अक्सिजन सिलिन्डर मुयाः मि च्याःगु खँ येँ मनपा २७ वडाया वडा दुजः नरेशमान महर्जनं नेपालभाषा टाइम्सयात कनादिल ।

हितिइ लः वःगुलिं मेसिन चायेकाः पुण्यतारा तले थहां वनेवं छुं मूगु तायेवं मतया स्वीच अफ याःगु व लिपा स्वये धकाः कुहां वयेत्यंबलय् मि च्याःगु खनाः तले बिसिउँ वंगु खः ।

उगु मिं नापसं च्वंपिं अजय स्थापित व कल्पना तुलाधरया छेँ नं मिं नःगु खः । अथेहे रामेश्वर प्रजापतिया छेँय् नं लिच्वः लाःगु खँ दरवारमार्ग प्रहरी प्रभागया डीएसपी डानबहादुर मल्लं नेपालभाषा टाइम्सयात कनादीगु दु । वय्कलं कनादी कथं अक्सिजन सिलिन्डर छगःयां लिपा मेगु यानाः लगातार हे स्वीन्यागः तक मूगु खः । अन अक्सिजन ज्वयाच्वंगु खःसां उकिं छुं गन्ध मवइगु जुयाः ज्वःगु सी मदुगु खः । सिलिन्डर मूबलय् सर्गतय् पटाखा मुइकेबलय् थें मिया छर्रा न्यना वंगु खः ।

छेँ मिं नयाः पुण्यताराया काय सुवर्ण स्थापितया लिसें बालं च्वनाच्वंपिं न्याम्ह मनू घाःपाः जूगु खँ नं प्रहरीं धाःगु दु । उगु मि स्यायेगु लागिं येँया दमकल, सेना, प्रहरी, सशस्त्र प्रहरी व स्थानीय जनता सक्रिय जूगु खः । अथे मिं नयाः पुण्यताराया छेँ पूर्ण रुपं क्षति जूगु दुसा मेपिनिगु छेँ नं बांमलाक क्षति जूगु दु ।

थ्वहे झ्वलय् येँ महानगर– पालिकाया प्रमुख विद्यासुन्दर शाक्यं म्हिगः हे मिं नःगु छेँ व उगु लागाय् निरीक्षण यानादीगु दु । लिसें
वय्कः ट्रमा सेन्टर झायाः अन वासः याकातःपिं घाइतेतय्त नं नापलानादीगु खः । पीडितपिंत नापलानाः मेयर शाक्यं क्षतिया विवरण वयेधुंकल कि मनपापाखें फुकथं ग्वाहालि यायेगु बचं नं बियादिल । छेँ मिं नयाः पिहां वःगु फोहोरं नं म्हिगः जक न्यागू टिप वायेगु ज्या जूगु खः ।