विलासी ज्वलंया कर थकाइगु

येँ – विलासी सामानया कर अप्वयेकेगु तयारी अर्थ मन्त्रालयं यानाच्वंगु खँ सीदुगु दु । अर्थमन्त्री युवराज खतिवडां विलासी सामानया कारणं व्यापार घाटा अप्वया वनाच्वंगु धासें कर अप्वयेकेगु तयारी यानाच्वंगु खः । नेपाःमितय् आम्दानी स्वयां अप्वः विलासी सामान दुहां वयाच्वंगुलिं उकियात पनेगु कथं कर अप्वयेकेगु तयारी जुयाच्वंगु खः ।

विशेष यानाः विलासी गाडी व मोटरसाइकलया कर अप्वयेकेगु तयारी मन्त्रालयं यानाच्वंगु खँ धाःगु दु । विलासी गाडी गइपिं अप्वया वनाच्वंगु व बैंकतय्सं सरल रुपं त्यासा बीगु यानाच्वंगुलिं कर अप्वयेकेमाःगु खँ अर्थ मन्त्रालय सूत्रं धाःगु दु ।

विलासी सामान आयात अप्वया वनाच्वंगुलिं विप्रेषणपाखें दुहां वइगु अधिकांश ध्यबा हानं विदेशय् तुं लिहां वनाच्वंगुलिं जनताया जीवनस्तर थहां वये मफयाच्वंगु विश्लेषण नं अर्थ मन्त्रालयं यानाच्वंगु दु । थ्व विश्लेषणया लिसें विप्रेषणपाखें दुहां वःगु ध्यबायात उद्योगधन्दाय् गुकथं लगानी याके फइ धइगु बारे योजना दयेकेगु ज्या जुयाच्वंगु दु ।

विप्रेषणं दुहां वइगु ध्यबायात छेँजःपिंसं नं विलासी सामान न्यायेगुली छ्यलाच्वंगुलिं उकियात उद्योग धन्दाय् लगानी याकेपाखे मन्त्रालयं योजना दयेकाच्वंगु दु । आः हे नं सरकारं विप्रेषणं वइगु ध्यबा थीथी राष्ट्रिय योजनाय् लगानी याकेगु धकाः घोषणा यानातःगु खःसां नं लगानी धाःसा म्हो जक जुयाच्वंगु दु गुकिं यानाः राष्ट्रिय आम्दानी अप्वये फयाच्वंगु मदुगु खँ धाःगु दु ।

 

सम्बन्धित बुखँ

LEAVE YOUR COMMENTS