
येँ(नेपालभाषा टाइम्स)- म्याग्दी जिल्लाया सदरमुकाम बेनीइ द्वहं प्याखं प्रदर्शन याःगु दु । बेनीया स्थानीय नेवाःतय्सं सदरमुकाम बेनी बजारय् द्वहं प्याखं क्यंगु खः । नेपालभाषा मंकाः खलः बेनी अन्तर्गतया ल्याय्म्ह पुचलं बर्खे प्याखं अन्तर्गत उगु द्वहं प्याखं क्यंगु खः । बजारय् जुइगु वा पीगु जात्रा (रोपाइँ) प्याखंया जानकारी बीगु ल्याखं मुखियां द्वहं प्याखं क्यंगु खः । उगु इलय् द्वहं प्याखनं बेनी बजाः परिक्रमा नं याःगु खः ।
बर्खे प्याखं अन्तर्गत जुइगु वा पीगु (रोपाइँ) जात्राय् ब्वति कायेत इनाप यायेकथं द्वहंलिसें मुखियां बजाः चाःहिलेगु याइगु खः । मुखियां क्याप्टेनया बुइँ जुइगु वा पीगु ज्याय् ब्वति कायेत धासें इनाप यायेगु चलन दुगु मंकाः खलः बेनीं जानकारी बिउगु दु ।
वा पीगु जात्रा वा प्याखनय् वा पीत द्वहं, बुँ पालीपिं, सिनाज्या याइपिं तष्री अवस्थाय् दुगु व सिनाज्या याइपिंत ब्वति कायेत मुखियां बजाः चाःहिलाः जानकारी याकेगु चलन दुगु ल्याय्म्ह पुचःया दुजः सज्जन श्रेष्ठं कनादिल । द्वहंलिसें मुखियां बजाः, चुक, त्वाः आदि थासय् चाःहिलाः जात्रा ब्वति कायेत इनाप यासें सुचं बीगु व ब्वति मकाइपिंत कारवाही यायेत आदेश नं बीगु चलन दु ।
दँय्दसं नागपचमिया दिंनिसें शुरु जुइगु प्याखं चथाः छन्हु न्ह्यःतक क्यनेगु याइ । बेनी बजारया बर्खे प्याखं अन्तर्गत क्यनीगु थ्व प्याखनय् लाखे प्याखं, सल प्याखं, सापारु प्याखं, श्रीकृष्णया रथ जात्रालिसें द्वहं प्याखं क्यनेगु याना वयाच्वंगु दुसा वा पीगु प्याखं व वामा प्याखं नं क्यनेगु तयारी जुयाच्वंगु दु ।
LEAVE YOUR COMMENTS